തീയേറ്ററുകളില്‍ കോവിഡ് നിയന്ത്രണങ്ങളില്ല, മുഴുവന്‍ സീറ്റിലും ആളുകളെ അനുവദിക്കുമെന്ന് തമിഴ്നാട് സര്‍ക്കാര്‍

തിയറ്ററുകളെ കോവിഡ് നിയന്ത്രണങ്ങളില്‍ നിന്ന് ഒഴിവാക്കി തമിഴ്‌നാട് സര്‍ക്കാര്‍. മുഴുവന്‍ ആളുകളെയും തിയറ്ററുകളില്‍ പ്രവേശിപ്പിക്കാമെന്ന പുതിയ ഉത്തരവ് തമിഴ്നാട് സര്‍ക്കാര്‍ പുറത്തിറക്കി. കോവിഡിനെ തുടര്‍ന്ന് നഷ്ടത്തിലായ സിനിമാ വ്യവസായത്തിനും വിജയ് ചിത്രമായ മാസ്റ്റര്‍ റിലീസിനും ഇത് ഗുണം ചെയ്യുമെന്ന് തിയറ്റര്‍ ഉടമകള്‍ പ്രതികരിച്ചു. ജനുവരി 11 മുതലാണ് തീയേറ്ററുകളില്‍ നൂറ് ശതമാനം ആളുകളെ പ്രവേശിപ്പിക്കാമെന്ന് സര്‍ക്കാര്‍ ഉത്തരവായിരിക്കുന്നത്.

അതേ സമയം കേന്ദ്രസര്‍ക്കാര്‍ മാനദണ്ഡം മറികടന്നാണ് തമിഴ്‌നാട് ചീഫ് സെക്രട്ടറിയുടെ പുതിയ ഉത്തരവ്. കോവിഡ് കേസുകള്‍ കുറയുന്നത് കണക്കിലെടുത്താണ് തീരുമാനമെന്നാണ് ചീഫ് സെക്രട്ടറിയുടെ ഉത്തരവില്‍ പറയുന്നത്. അന്‍പത് ശതമാനം പ്രവേശനം അനുവദിച്ചു കൊണ്ട് പ്രദര്‍ശനം തുടരുന്നത് കടുത്ത നഷ്ടമുണ്ടാകുമെന്നും നിയന്ത്രണം നീക്കണമെന്നും തിയറ്റര്‍ ഉടമകള്‍ ആവശ്യപ്പെട്ടിരുന്നു. വിജയുടെ മാസ്റ്റര്‍ ഈ മാസം 13 ന് തിയറ്ററിലെത്തുന്ന സാഹചര്യത്തില്‍ കൂടിയാണ് തീരുമാനം.

കഴിഞ്ഞ ദിവസം മുഖ്യമന്ത്രി എടപ്പാടി കെ.പളനിസ്വാമിയുമായി നടന്‍ വിജയ് കൂടിക്കാഴ്ച നടത്തിയിരുന്നു. തിയറ്ററുകള്‍ നൂറുശതമാനം ആളുകളെ പ്രവേശിപ്പിക്കാന്‍ അനുവദിക്കണമെന്ന് അദ്ദേഹം മുഖ്യമന്ത്രിയോട് ആവശ്യപ്പെട്ടതായി റിപ്പോര്‍ട്ടുകള്‍ ഉണ്ടായിരുന്നു. അതേ സമയം മുഖ്യമന്ത്രി ഇത് നിഷേധിച്ചിരുന്നു. മാസ്റ്ററിനെ കുറിച്ച് സംസാരിക്കാന്‍ അല്ല വിജയ് വന്നതെന്നായിരുന്നു മുഖ്യമന്ത്രിയുടെ പ്രതികരണം. കോവിഡിനെ തുടര്‍ന്ന് പ്രതിസന്ധിയിലായ തമിഴ് ചലച്ചിത്ര മേഖലയെ സഹായിക്കണമെന്നും, ഇതിനായുള്ള നിര്‍ദ്ദേശങ്ങള്‍ അദ്ദേഹം മുന്നോട്ട് വെച്ചെന്നും മുഖ്യമന്ത്രി പറഞ്ഞിരുന്നു.