ഡൽഹിയിൽ തീയറ്ററുകൾ തുറന്നു; സിനിമ കാണുവാൻ എത്തിയത് വെറും നാല് പേർ..!

ലോക്ഡൗണിന് ശേഷം തീയറ്ററുകൾ തുറക്കുവാൻ അനുമതി നൽകിയതോടെ പല സംസ്ഥാനങ്ങളിലും തീയറ്ററുകൾ തുറന്നിരിക്കുകയാണ്. പക്ഷേ തീയറ്ററുകളിൽ ഇനിയും ആളുകൾക്ക് കയറുവാനുള്ള ധൈര്യം ആയിട്ടില്ല. ഡൽഹിയിലെ ഗ്രേറ്റര്‍ കൈലാഷ്​ ഏരിയയിലെ തിയറ്ററില്‍ ഉച്ചയ്ക്കുള്ള ഷോയ്ക്ക്​ വെറും നാലു ടിക്കറ്റുകള്‍ മാത്രമാണ്​ വിറ്റുപോയത്​. 2.30-നുള്ള ഷോയ്ക്ക്​ അഞ്ചുപേരും. പുതിയ സിനിമകളൊന്നും തിയറ്ററില്‍ റിലീസ്​ ചെയ്​തിട്ടില്ല എന്നതും ആളുകൾ കുറയാൻ കാരണമായി. പഴയ ചില സിനിമകൾ മാത്രമാണ് ഇപ്പോൾ പ്രദർശിപ്പിക്കുന്നത്. സുശാന്ത് സിംഗിന്റെ അവസാന തീയറ്റർ റിലീസ് ചിച്ചോരെ, കേദാർനാഥ്, തൻഹാജി, ശുഭ് മംഗൾ സ്യാദ സാവധാൻ, മലാങ്, വാർ, തപ്പഡ് എന്നീ ചിത്രങ്ങളാണ് ഇപ്പോൾ പ്രദർശിപ്പിക്കുന്നത്.

ഡൽഹി, ഹരിയാന, ഉത്തർ പ്രദേശ്, വെസ്റ്റ് ബംഗാൾ, മധ്യപ്രദേശ്, ഗുജറാത്ത്, ആന്ധ്ര പ്രദേശ്, കർണാടക തുടങ്ങിയ സംസ്ഥാനങ്ങളിലാണ് തീയറ്ററുകൾ വീണ്ടും തുറന്നിരിക്കുന്നത്. അതേ സമയം വടക്കുകിഴക്കൻ സംസ്ഥാനങ്ങളിലും മഹാരാഷ്ട്ര, തെലുങ്കാന, തമിഴ് നാട്, കേരളം, ഛത്തീസ്ഗഢ് എന്നീ സംസ്ഥാനങ്ങളിലും തീയറ്ററുകൾ തുറന്നിട്ടില്ല. കോവിഡ്​ മാനദണ്ഡങ്ങള്‍ പാലിച്ച്‌​ പകുതി സീറ്റില്‍ മാത്രം ഇരിപ്പിടം ഒരുക്കിയാണ്​ തിയറ്ററുകള്‍ വീണ്ടും തുറന്നിരിക്കുന്നത്. അടുത്ത ആഴ്ചയോട് കാഴ്ചക്കാരുടെ എണ്ണത്തിൽ വർദ്ധനവ് ഉണ്ടാകുമെന്നാണ് കരുതുന്നതെന്ന് തീയറ്ററുകൾ ഉടമകൾ പറയുന്നു.