തെങ്കാശിയിൽ നിന്നുമെത്തി കേരളം കീഴടക്കുന്ന മന്ദമാരുതൻ | തെങ്കാശിക്കാറ്റ് റിവ്യൂ

മലയാളികൾക്ക് എന്നും ഏറെ ഇഷ്ടപ്പെട്ട ഒരു സ്ഥലമാണ് തെങ്കാശി. പ്രത്യേകിച്ചും മലയാളി സിനിമ പ്രേമികൾക്ക്. ഇപ്പോഴിതാ ഒരു മന്ദമാരുതൻ പോലെ ഒരു ചിത്രം കൂടി എത്തിയിരിക്കുകയാണ്. ശിനോദ് സഹദേവൻ സംവിധാനം നിർവഹിച്ച തെങ്കാശികാറ്റ്‌ മനോഹരമായ ഒരു പ്രണയകാവ്യത്തിന്റെ സൗന്ദര്യമാണ് പ്രേക്ഷകർക്കായി ഒരുക്കിയിരിക്കുന്നത്. അത്ര വലിയ താരനിരയോ വമ്പൻ ബാനരോ ബഡ്ജറ്റോയില്ലാതെ തയ്യാറാക്കിയിരിക്കുന്ന ചിത്രം പ്രേക്ഷകന് പൂർണമായ ഒരു ആസ്വാദനം തരുന്നില്ലെങ്കിൽ പോലും പ്രേക്ഷകന് കണ്ടിരിക്കാവുന്ന ഒരു വിരുന്ന് തന്നെയാണ് സമ്മാനിക്കുന്നത്. ഹേമന്ത് മേനോൻ, കാവ്യ സുരേഷ് എന്നിവരാണ് കേന്ദ്ര കഥാപാത്രങ്ങളെ അവതരിപ്പിച്ചിരിക്കുന്നത്.

തമിഴ് നാട്ടിലെ തെങ്കാശി എന്ന ഗ്രാമത്തിൽ ജോലി തേടിയെത്തിയ മൂന്ന് യുവാക്കൾ അവിടെ സംസ്കാര ചടങ്ങുകളിൽ വാദ്യമേളങ്ങൾ മുഴക്കുന്ന ജോലിയിലൂടെ ജീവിതം കരുപിടിപ്പിക്കുന്നു. അതിനിടയിൽ ആ സംഘത്തിലെ ശിവ എന്ന യുവാവിന് വൈഗ എന്ന പെൺകുട്ടിയെ ഇഷ്ടപ്പെടുകയും ചെയ്യുന്നു. അതേ സമയം ഒരു ലോക്കൽ ഗുണ്ടയായ അലക്‌സ് പാൻഡ്യനും അവളോട് ഇഷ്ടം തോന്നുന്നു. ഈ ത്രികോണ പ്രണയത്തിനിടയിലെ നിരവധി സംഭവവികാസങ്ങളിലൂടെയാണ് തെങ്കാശിക്കാറ്റ് കേരളക്കരയിൽ വീശിയടിക്കുന്നത്.

മൂന്ന് വ്യത്യസ്ത ഗെറ്റപ്പുകളിൽ എത്തി പ്രേക്ഷകരെ കൈയ്യിലെടുക്കുന്ന പ്രകടനം തന്നെയാണ് ഹേമന്ത് മേനോൻ പുറത്തെടുത്തിരിക്കുന്നത്. സംഘട്ടനരംഗങ്ങളിലും മികവാർന്ന ഒരു പ്രകടനം ഹേമന്ത് മേനോനിൽ നിന്നും കാണാൻ സാധിച്ചിട്ടുണ്ട്. കാവ്യ സുരേഷും തന്നാൽ കഴിയുന്ന വിധം തന്റെ റോൾ മനോഹരമാക്കിയിട്ടുണ്ട്. പദ്മരാജ് രതീഷ്, ഭീമൻ രഘു, ഷഫീഖ് റഹ്മാൻ, സുനിൽ സുഗത എന്നിവരും അവരുടെ റോളുകൾ പ്രേക്ഷകർക്ക് ഇഷ്ടപ്പെടുന്ന രീതിയിൽ അവതരിപ്പിച്ചിട്ടുണ്ട്. ചിത്രത്തിന്റെ കഥാഗതിക്ക് ചേരുന്ന വിധത്തിലുള്ള സംഗീതവുമായി ഋത്വികും തെങ്കാശിയുടെ സൗന്ദര്യം മനോഹരമായി തന്റെ ക്യാമറ കണ്ണുകളിലൂടെ ഒപ്പിയെടുത്ത് സഞ്ജിത്തും തെങ്കാശിക്കാറ്റിനെ പ്രേക്ഷകർക്ക് ഏറെ രസം പകരുന്ന ഒന്നാക്കി തീർത്തിട്ടുണ്ട്.