‘മഞ്ജുവിനൊപ്പം അഭിനയിച്ചപ്പോള്‍ അച്ഛന്‍ നെര്‍വസായെന്ന് തോന്നിയിട്ടുണ്ട്‌’; ഷോബി തിലകന്‍ പറയുന്നു

മലയാളത്തില്‍ അഭനയത്തിന്റെ കുലപതികളിലൊരാള്‍ എന്ന് നടന്‍ തിലകനെ വിശേഷിപ്പിക്കാം. മരണ ശേഷവും അദ്ദേഹത്തിന് പകരമാകാന്‍ ഒരാള്‍ വന്നിട്ടില്ല. അച്ഛന്‍ കഥാപാത്രങ്ങളും വില്ലന്‍ കഥാപാത്രങ്ങളും ഹാസ്യകഥാപാത്രങ്ങളുമെല്ലാം അദ്ദേഹം അനായാസം കൈകാര്യം ചെയ്തു. നാടക ലോകത്തുനിന്ന് കടന്നുവന്ന തിലകന് അഭിനയം അനായാസമായി. ഇപ്പോഴിതാ തിലകനെ കുറിച്ച് മനസുതുറക്കുകയാണ് നടനും മകനുമായ ഷോബി തിലകന്‍.

മറ്റുള്ളവരെ പറ്റി നല്ലത് പറയാന്‍ അല്‍പം ബുദ്ധിമുട്ടുള്ള തിലകന്‍ അസാധ്യ പെര്‍ഫോമന്‍സ് എന്ന് പറഞ്ഞിട്ടുള്ളത് മഞ്ജു വാര്യരെ പറ്റിയാണെന്നാണ് ഷോബി തിലകന്‍ പറയുന്നത്. കണ്ണെഴുതി പൊട്ടും തൊട്ട് എന്ന സിനിമയില്‍ അത് കാണാന്‍ പറ്റും. മഞ്ജുവിനൊപ്പം അഭിനയിച്ചപ്പോള്‍ അച്ഛന്‍ നെര്‍വസായെന്ന് തോന്നിയിട്ടുണ്ടെന്നും ഷോബി പറഞ്ഞു.
മഞ്ജുവിന്റെ കൂടെ നിന്ന് താഴെ പോവാന്‍ പാടില്ലല്ലോ. അത്രയ്ക്ക് മനോഹരമായിരുന്നു മഞ്ജുവിന്റെ പ്രകടനം. രണ്ട് പേരും കട്ടക്ക് നിന്നുവെന്നും ഷോബി പറഞ്ഞു.

ഉസ്താദ് ഹോട്ടലിലെ അഭിനയത്തിന് ദുല്‍ഖറിനെയും തിലകന്‍ പ്രശംസിച്ചു എന്ന് ഷോബി പറഞ്ഞു. ഉസ്താദ് ഹോട്ടലിന്റെ ലൊക്കേഷനില്‍ നിന്ന് താനും അച്ഛനും റിയാദിലേക്ക് പോവുകയായിരുന്നു. ആ സമയത്ത് താന്‍ ദുല്‍ഖറിനെ പറ്റി ചോദിച്ചു. ദുല്‍ഖറിന്റെ പ്രായംവച്ച് നോക്കുമ്പോള്‍ നന്നായിട്ട് ചെയ്യുന്നുണ്ടെന്നാണ് അച്ഛന്‍ പറഞ്ഞത്. അവന്റെ ആ പ്രായത്തില്‍ ഈ ഒരു കഥാപാത്രം ചെയ്യാന്‍ പറ്റുമോ എന്നൊരു സംശയം തനിക്കുണ്ടായിരുന്നു. പക്ഷേ അവന്‍ നന്നായിട്ട് ചെയ്യുന്നുണ്ട്. ആദ്യമായിട്ടാണ് യങ്ങായ ഒരു നടന് അച്ഛന്റടുത്ത് നിന്നും ഇത്രയധികം പ്രശംസ ലഭിക്കുന്നതെന്നും ഷോബി പറഞ്ഞു.