നിവിൻ പോളി ചിത്രം തുറമുഖം ഓൺലൈൻ റിലീസിന്? മനസ്സ് തുറന്ന് സംവിധായകൻ രാജീവ് രവി

മാർച്ച്, ഏപ്രിൽ മാസങ്ങളിലായി തീയറ്ററുകളിൽ എത്തേണ്ടിയിരുന്ന മലയാള ചിത്രങ്ങളുടെയെല്ലാം റിലീസ് ലോക്ക്ഡൗൺ മൂലം നീട്ടി വെച്ചിരിക്കുകയാണ്. തീയറ്ററുകൾ തുറക്കുന്ന കാര്യത്തിൽ അനിശ്ചിതത്വം നിലനിൽക്കുന്നതിനാൽ തന്നെ പല നിർമാതാക്കളും ഡിജിറ്റൽ റിലീസിനായി തയ്യാറെടുക്കുകയാണ്. എന്നാൽ വമ്പൻ ചിത്രങ്ങൾ എല്ലാം തന്നെ തീയറ്ററുകളിൽ റിലീസ് ചെയ്യുമെന്നാണ് അറിയുവാൻ കഴിയുന്നത്.

നിവിൻ പോളിയെ നായകനാക്കി രാജീവ് രവി ഒരുക്കുന്ന തുറമുഖത്തിന്റെ റിലീസിനെ കുറിച്ചും പ്രേക്ഷകർ ആകാംക്ഷയിലാണ്. ചിത്രത്തിന്റെ ഓൺലൈൻ റിലീസിനെ കുറിച്ച് സംവിധായകൻ രാജീവ് രവിയുടെ വാക്കുകൾ ഇങ്ങനെ…

ഞങ്ങൾ ഇപ്പോൾ ചിത്രത്തിന്റെ പോസ്റ്റ് പ്രൊഡക്ഷൻ വർക്കുകൾ തീർക്കുവാനുള്ള ശ്രമത്തിലാണ്. വമ്പൻ ബഡ്‌ജറ്റിൽ ഒരുക്കിയിരിക്കുന്ന ഒരു ചിത്രമെന്നതിനാൽ തന്നെ തീയറ്ററുകളിൽ റിലീസ് ചെയ്യുവാനാണ് ഞങ്ങൾ ശ്രമിക്കുന്നതും. കോറോണഭീതിയിൽ നിൽക്കുന്ന ഈ ഒരു അവസരത്തിൽ ഒട്ടു മിക്കവരും തീയറ്ററുകളിലോ മൾട്ടിപ്ളെക്സുകളിലോ പോയി സിനിമ കാണുവാൻ ആഗ്രഹിക്കുന്നവരായിരിക്കില്ല. ഡിജിറ്റൽ റിലീസുകളിലേക്ക് ലോകം മാറുന്ന ഈ കാലത്ത് ഭാവിയിൽ എങ്ങനെയായിരിക്കും എന്ന് കൃത്യമായി പറയുവാനും സാധിക്കില്ല.

കമ്മട്ടിപ്പാടം എന്ന ചിത്രത്തിനുശേഷം രാജീവ് രവി സംവിധാനം ചെയ്യുന്ന ചിത്രമാണ് തുറമുഖം. നിവിൻ പോളി, ഇന്ദ്രജിത് സുകുമാരൻ, നിമിഷ സജയൻ, അർജുൻ അശോകൻ, പൂർണിമ ഇന്ദ്രജിത് തുടങ്ങി വലിയൊരു താര നിര തന്നെ ചിത്രത്തിലുണ്ട്. പേര് സൂചിപ്പിക്കും പോലെ കൊച്ചി തുറമുഖവുമായി ബന്ധപ്പെട്ട ഒരു സ്റ്റോറി ലൈൻ ആണ് ചിത്രത്തിന് ഉള്ളത്.1962 വരെ കൊച്ചിയില്‍ നിലനിന്നിരുന്ന ചാപ്പ തൊഴില്‍ വിഭജന സമ്ബ്രദായവും, ഇത് അവസാനിപ്പിക്കാന്‍ തൊഴിലാളികള്‍ നടത്തിയ സമരവുമാണ് ചിത്രത്തിന്റെ പ്രധാന പ്രമേയം.