‘നോ വുമൺ, നോ ക്രൈ’; വിനായകന് ഒപ്പമുള്ള സൗഹൃദത്തിന്റെ സിൽവർജൂബിലി ആഘോഷിച്ച് ടിനി ടോം

നടൻ വിനായകന് ഒപ്പമുള്ള 25 വർഷത്തെ സൗഹൃദം ആഘോഷിച്ച് നടൻ ടിനി ടോം. സോഷ്യൽ മീഡിയയിലൂടെയാണ് സൗഹൃദത്തിന്റെ സിൽവർ ജൂബിലി നടൻ ടിനി അറിയിച്ചത്. വിനായകന്റെ തോളിൽ കൈയിട്ട് ചിരിച്ചു നിൽക്കുന്ന ചിത്രമായിരുന്നു ടിനി ടോം പങ്കുവെച്ചത്. ഒപ്പമുള്ള അടിക്കുറിപ്പിൽ ബോബ് മാർലിയുടെ ‘നോ വുമൺ, നോ ക്രൈ’ എന്ന വരികളും ടിനി ടോം കുറിച്ചു. കോളേജ് കാലം മുതലുള്ള സൗഹൃദത്തിനാണ് 25 വർഷങ്ങൾ ആയിരിക്കുന്നതെന്നും ടിനി കുറിച്ചു. ‘നോ വുമൺ, നോ ക്രൈ. ബോബ് മാർലി, കോളേജ് കാലം മുതലുള്ള 25 വർഷത്തെ സൗഹൃദം ആഘോഷിക്കുന്നു. എല്ലാക്കാലത്തേക്കും കൂട്ടുകാർ’ എന്ന വരികൾ കുറിച്ചാണ് ടിനി ടോം സൗഹൃദ വിശേഷം ആരാധകരുമായി പങ്കുവെച്ചത്.

വിവാദങ്ങൾക്കിടയിൽ വിനായകനെ ചേർത്തു നിർത്തിയ ടിനി ടോമിന് ആരാധകരുടെ ഭാഗത്ത് നിന്ന് സമ്മിശ്ര പ്രതികരണമാണ് ലഭിച്ചത്. ‘ഇതു പോലുള്ള വേസ്റ്റിനെ ചേർത്ത് നിർത്തി സ്വന്തം വില കളയല്ലെ ടിനി ചേട്ട’, ‘മലയാള സിനിമയിലെ രണ്ട് മഹാ പ്രതിഭകൾ’, ‘ഒരു നാണയത്തിന്റെ ഇരുവശങ്ങൾ’, അങ്ങനെ അനുകൂലവും പ്രതികൂലവുമായ നിരവധി കമന്റുകളാണ് ടിനി ടോമിന്റെ ഫോട്ടോയ്ക്ക് താഴെ വന്നിരിക്കുന്നത്. ചില കമന്റുകൾക്ക് നടൻ ടോവിനോ തോമസിന്റെ ഒരു അഭിമുഖത്തിലെ ഭാഗം മറുപടിയായി ടിനി ടോം കൊടുക്കുന്നുണ്ട്. സോഷ്യൽ മീഡിയയിലെ നെഗറ്റീവ് കമന്റുകളെ കുറിച്ച് ചോദിക്കുമ്പോൾ അതിന് കാരണം തൊഴിലില്ലായ്മ ആണെന്ന് ടോവിനോ പറയുന്ന അഭിമുഖത്തിലെ ഭാഗമാണ് കമന്റായി ടിനി ടോം നൽകിയിരിക്കുന്നത്.

ഒരുത്തീ സിനിമയുടെ പ്രമോഷനുമായി ബന്ധപ്പെട്ട് നടന്ന വാർത്താസമ്മേളനത്തിൽ ആയിരുന്നു വിനായകന്റെ വിവാദ പരാമർശം. തനിക്ക് ഒരു സ്ത്രീയുമായി സെക്സ് ചെയ്യണമെന്ന് തോന്നിയാൽ താൻ ആ സ്ത്രീയോട് ചോദിക്കുമെന്നും അങ്ങനെ ഇതുവരെ പത്തു സ്ത്രീകളുമായി താൻ സെക്സ് ചെയ്തിട്ടുണ്ടെന്നും വിനായകൻ വാർത്താസമ്മേളനത്തിൽ വെച്ച് പറഞ്ഞു. മീടു ആരോപണത്തെക്കുറിച്ച് ചോദിച്ചപ്പോൾ ആയിരുന്നു വിനായകന്റെ പരാമർശം. എന്താണ് മീടു എന്ന് തനിക്കറിയില്ലെന്നും വിനായകൻ പറഞ്ഞിരുന്നു. കൂടാതെ, വാർത്താസമ്മേളനത്തിന് എത്തിയിരുന്ന മാധ്യമപ്രവർത്തകയെ ചൂണ്ടിക്കാട്ടി മോശം പരാമർശം നടത്തിയതിന് പിന്നീട് വിനായകൻ ക്ഷമാപണം നടത്തുകയും ചെയ്തിരുന്നു.