‘നാണ്, പിർത്തിറാജ്, അണൂപ്‌ മേനോണ്, ഉണ്ണി മുകുന്ദൻ’; ട്രോളൻമാർക്ക് ചാകര ഒരുക്കി ടിനിയുടെ മാസ് ഐറ്റം, പിന്നാലെ സോഷ്യൽമീഡിയയിൽ ബാലക്കൊപ്പമുള്ള ഫോട്ടോയും

കഴിഞ്ഞ കുറച്ചു ദിവസങ്ങളായി സോഷ്യൽ മീഡിയയിൽ എവിടെ നോക്കിയാലും ഒരു ഡയലോഗ് മാത്രമേ കാണാനും കേൾക്കാനും ഉള്ളൂ. ‘നാണ്, പിർത്തിറാജ്, അണൂപ്‌ മേനോണ്, ഉണ്ണി മുകുന്ദൻ’ എന്നതാണ് അത്. ട്രോളൻമാർ ഇതിനെ വെറുതെ വിട്ടില്ല. നിറയെ ട്രോളുകളും വന്നുതുടങ്ങി. ചിലർ ടിനി ടോമിന്റെ മിമിക്രി ഗംഭീരമാണെന്ന് ട്രോൾ ഉണ്ടാക്കിയപ്പോൾ മറ്റു ചിലർ ബാലയെ ട്രോളാനാണ് തുടങ്ങിയത്. ‘എന്താണ് ലെമൺ ടീ ഒക്കെ ചോയ്ച്ചെന്ന് കേട്ട്… നാണ്, പിർത്തിറാജ്, അണൂപ്‌ മേനോണ്, ഉണ്ണി മുകുന്ദൻ’, എന്ന് പോകുകയാണ് ട്രോളുകൾ.

രമേഷ് പിഷാരടിയുമൊത്ത് ഒരു ടിവി ഷോയിൽ പങ്കെടുക്കുന്നതിനിടയിൽ ആയിരുന്നു ട്രോളുകൾക്ക് ആധാരമായ സംഭവം നടന്നത്. രമേഷ് പിഷാരടി നേതൃത്വം നൽകുന്ന ‘ഫൺസ് അപ്പോൺ എ ടൈം’ എന്ന സ്റ്റാൻഡ് അപ് കോമഡി ഷോ പരിപാടിയിൽ പങ്കെടുക്കാൻ എത്തിയത് ആയിരുന്നു ടിനി ടോം. ഹിറ്റ് ലിസ്റ്റ് എന്ന സിനിമയിൽ അഭിനയിക്കാൻ വേണ്ടി ബാല ടിനിയെ വിളിച്ചതിനെക്കുറിച്ച് ആയിരുന്നു ടിനി ടോം ഷോയിൽ പറഞ്ഞത്. ബാലയുടെ ശബ്ദം അതേപോലെ അനുകരിച്ച് ആയിരുന്നു ടിനി ടോം ഇങ്ങനെ പറഞ്ഞത്. 2012ൽ ബാല തിരക്കഥയെഴുതി സംവിധാനം ചെയ്ത സിനിമയായിരുന്നു ‘ഹിറ്റ് ലിസ്റ്റ്’. അതിൽ അഭിനയിക്കാൻ വേണ്ടി ബാല തന്നെ ക്ഷണിച്ചത് ഓർത്തെടുത്താണ് ടിനി പറഞ്ഞത്. ‘ടിനിയേട്ടാ, നമ്മള് ഫ്രണ്ട്സ് സെറ്റപ്പില് അതായത് നാണ്, പിർത്തിരാജ്, ഉണ്ണി മുകുന്ദൻ, അനൂപ് മേനോൻ എല്ലാവരും ചേർന്നൊരു പടം ചെയ്യുന്നു. നിങ്ങളുടെ പേമെന്റ് എത്രയാണെന്ന് പറയൂ’ – തുടർന്ന് എക്സിക്യുട്ടീവ് എൽദോ വിളിക്കുമെന്ന് പറഞ്ഞ് ബാല ഫോൺ കട്ട് ചെയ്തു.

പിന്നാലെ എൽദോ വിളിച്ചെന്നും എത്ര ദിവസം ഷൂട്ട് ഉണ്ടാകുമെന്ന് ചോദിച്ചപ്പോൾ നാലഞ്ചു ദിവസം ഉണ്ടാകുമെന്ന് പറഞ്ഞെന്നും ടിനി പറഞ്ഞു. ഒരു 3 – 4 രൂപ കിട്ടില്ലേ എന്ന് ചോദിച്ചപ്പോൾ ഇപ്പോ പറയാമെന്ന് പറഞ്ഞ് എൽദോ വെച്ചു. കുറച്ചു കഴിഞ്ഞപ്പോൾ ബാല വിളിച്ച് ‘നിങ്ങള് 3 – 4 രൂപ ചോദിച്ചോ ? നിങ്ങള് കമ്മിയായിട്ട് പറയ്, നാണ്, പിർത്തിറാജ്, അണൂപ്‌ മേനോണ്, ഉണ്ണി മുകുന്ദൻ… എന്ന് പറഞ്ഞു തുടങ്ങി. ഇത് കേട്ടപ്പോൾ തനിക്ക് പേടിയായെന്നും ആ ബെൽറ്റിൽ നിന്ന് താൻ ഔട്ടാവുമോ? എന്ന് തോന്നി തുടങ്ങിയെന്നും ടിനി വ്യക്തമാക്കി. തുടർന്ന് എൽദോയോട് കുറച്ചു രണ്ടു രൂപയാക്കി കുറച്ചു പറഞ്ഞു. വീണ്ടും അതേ ഡയലോഗുമായി വിളിച്ചു. അത് കഴിഞ്ഞ് ഒരു രൂപയാക്കി കുറച്ചപ്പോൾ അതേ ഡയലോഗുമായി വീണ്ടും വിളിച്ചെന്നും തുടർന്ന് ഒന്നും പറയാതെ വന്ന് അഭിനയിച്ചോളാമെന്ന് താൻ പറഞ്ഞെന്നും ടിനി വ്യക്തമാക്കി. ഷൂട്ട് കഴിഞ്ഞ് ട്രാവലിംഗിന്റെ പൈസ ചോദിക്കാൻ ചെന്നപ്പോൾ, ‘നാണ്, പിർത്തിറാജ്, അണൂപ്‌ മേനോണ്, ഉണ്ണി മുകുന്ദൻ’ ഡയലോഗുമായി ബാല വീണ്ടുമെത്തിയെന്നും ടിനി പറഞ്ഞു. ഇങ്ങനെയൊക്കെ പറഞ്ഞെങ്കിലും സിനിമ കഴിഞ്ഞപ്പോൾ തനിക്ക് ബാല നല്ല കാശ് തന്നെന്നും ഇന്നും ബാല തന്റെ അടുത്ത സുഹൃത്താണെന്നും ടിനി പറഞ്ഞു. ഈ കഥ പിന്നീട് സുരാജ് ഒക്കെ വളർത്തി വലുതാക്കി വേറെ കഥയാക്കിയെന്നും ടിനി പറഞ്ഞു. ഏതായാലും ഈ കഥ സോഷ്യൽമീഡിയയിൽ വൈറലായതിന് പിന്നാലെ ബാലയ്ക്ക് ഒപ്പമുള്ള ചിത്രം ടിനി ടോം സോഷ്യൽ മീഡിയയിൽ പങ്കുവെച്ചു. ‘ബാലാ മൈ ബ്രോ’ എന്ന അടിക്കുറിപ്പോടെയാണ് ടിനി ടോം ചിത്രം പങ്കുവെച്ചത്.