സർപ്രൈസ് ആയി ടോവിനോ എത്തി, ഒപ്പം ഉണ്ണി മുകുന്ദനും; താരസാന്നിധ്യത്തിൽ വെള്ളേപ്പം ഓഡിയോ ലോഞ്ച്

തൃശൂർ നഗരത്തിലെ വെള്ളേപ്പത്തെരുവിന്റെ കഥ പറയുന്ന ചിത്രമായ ‘വെള്ളേപ്പം’ ഓഡിയോ ലോഞ്ച് ചെയ്തു. നവാഗതനായ പ്രവീൺ പൂക്കാടൻ ആണ് ചിത്രം സംവിധാനം ചെയ്യുന്നത്. ജിൻസ് തോമസും ദ്വാരക് ഉദയശങ്കറും ചേർന്നാണ് ചിത്രം നിർമിക്കുന്നത്. സിനിമയുടെ ഓഡിയോ ലോഞ്ച് ടൊവിനോ തോമസ്, ഉണ്ണി മുകുന്ദൻ, ഷൈൻ ടോം ചാക്കോ, അനിൽ രാധാകൃഷ്ണ മേനോൻ, മാളവിക മേനോൻ എന്നിവർ ചേർന്നാണ് നിർവഹിച്ചത്. തൃശൂരിൽ വെച്ചായിരുന്നു ഓഡിയോ ലോഞ്ച്.

ഷൈൻ ടോം ചാക്കോ, റോമ, നൂറിൻ ഷെരിഫ്, അക്ഷയ് രാധാകൃഷ്ണൻ, ശ്രീജിത്ത്‌ രവി, കൈലാഷ്, സോഹൻ സീനുലാൽ, സാജിദ് യഹിയ, സുനിൽ പറവൂർ, ഫാഹിം സഫർ, വൈശാഖ്, സാനിഫ്, ഫിലിപ്പ് തോകലൻ, റോഷ്‌ന അന്ന റോയ്, ക്ഷമ, ഭദ്ര വെങ്കിടെശ്വരൻ, കാതറിൻ സന്തോഷ്‌ എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്.

തൃശൂരിലെ സാംസ്കാരികതയും ഭക്ഷണവൈവിധ്യവും മതസൗഹാർദവും ഹാസ്യത്തിന്റെ അകമ്പടിയോടു കൂടി അവതരിപ്പിക്കുന്ന ചിത്രമാണ് വെള്ളേപ്പം. തൃശൂരിലെ വെള്ളേപ്പതെരുവും അവിടെ നടക്കുന്ന സംഭവ വികാസങ്ങളും ആണ് ചിത്രത്തിന്‍റെ ഇതിവൃത്തം. പത്തേമാരി, കുമ്പളങ്ങി നൈറ്റ്സ് തുടങ്ങിയ ചിത്രങ്ങളിലൂടെ ശ്രദ്ധേയയായ ദേശീയ – സംസ്ഥാന അവാർഡ് ജേതാവ് ജ്യോതിഷ് ശങ്കർ ആണ് ചിത്രത്തിലെ ശ്രദ്ധേയമായ പള്ളി ഉൾപ്പടെ കലാസംവിധാനം നിർവഹിച്ചത്. ചിത്രത്തിന്‍റെ എക്‌സിക്യുട്ടിവ് പ്രൊഡ്യൂസർ സംവിധായകനായ പ്രമോദ് പപ്പൻ ആണ്. ജീവൻലാൽ ചിത്രത്തിന് തിരക്കഥ ഒരുക്കിയപ്പോൾ എസ് പി വെങ്കിടേഷ്, എറിക് ജോൺസൻ, ലീല എൽ ഗിരീഷ് കുട്ടൻ എന്നിവർ ചേർന്ന് ചിത്രത്തിലെ ഗാനങ്ങൾ സംഗീത സംവിധാനം ചെയ്തിരിക്കുന്നു. ചിത്രത്തിന്‍റെ റിലീസ് തിയ്യതി ഉടൻ പ്രഖ്യാപിക്കുമെന്നാണ് അറിയിച്ചിട്ടുള്ളത്.