ലിനി സിസ്റ്ററിന്റെ മക്കളെ കണ്ടപ്പോൾ കരഞ്ഞുപോയി: ടോവിനോ

കേരളത്തെ ഭീതിയിൽ ആഴ്ത്തിയ നിപ്പയെ ആസ്പദമാക്കി ആഷിക് അബുവിന്റെ സംവിധാനത്തിൽ ഒരുങ്ങിയ ചിത്രമാണ് വൈറസ്. ചിത്രം ഇന്ന് മുതൽ പ്രദർശനം ആരംഭിച്ചു. ടോവിനോ തോമസ്, കുഞ്ചാക്കോ ബോബൻ, ശ്രീനാഥ് ഭാസി, ഇന്ദ്രജിത്, പാർവതി, റിമ കല്ലിങ്കൽ, രേവതി, പൂർണിമ ഇന്ദ്രജിത് തുടങ്ങിയ വൻ താര നിര തന്നെ ചിത്രത്തിലുണ്ട്. സിനിമയുടെ ഷൂട്ടിങ് സമയത്ത് തങ്ങൾക്കുണ്ടായ അനുഭവം ഒരു പ്രമുഖ മാധ്യമത്തിന് നൽകിയ അഭിമുഖത്തിൽ പങ്കുവെക്കുകയായിരുന്നു ടോവിനോ തോമസ്.

ചിത്രത്തിന്റെ പൂജ ദിവസം ഷൂട്ടിംഗ് ലൊക്കേഷനിൽ സിസ്റ്റർ ലിനിയുടെ ഭർത്താവും മക്കളും എത്തിയിരുന്നു. ആ കുഞ്ഞുങ്ങളെ കണ്ടപ്പോൾ ശരിക്കും കരഞ്ഞു പോയി എന്നാണ് ടോവിനോ പറഞ്ഞത്. കൂടാതെ നമ്മൾ വാർത്തയിൽ മാത്രം അറിഞ്ഞ നിപ്പയുടെ ഭീകരത എത്രത്തോളം ഉണ്ടായിരുന്നുവെന്ന് ഷൂട്ടിംഗ് സമയത്താണ് മനസിലായതെന്നും താരം പറഞ്ഞു. അതിനെ തരണം ചെയ്യാൻ വേണ്ടി കോഴിക്കോട് നാട്ടുകാരും സർക്കാരും എത്രത്തോളം കഠിനാധ്വാനം ചെയ്തതെന്ന് ഇപ്പോഴാണ് മനസിലാകുന്നതെന്നും താരം കൂട്ടിച്ചേർത്തു.