മിന്നൽ മുരളിക്ക് രണ്ടാം ഭാഗം ഉണ്ടാകുമെന്ന് സൂചനയേകി ടോവിനോ തോമസ്

പ്രേക്ഷകർ ഏറ്റവുമധികം കാത്തിരിക്കുന്ന മലയാള സിനിമകളിൽ ഒന്നാണ് ടോവിനോ തോമസ് നായകനായ മിന്നൽ മുരളി. കുഞ്ഞിരാമായണം. ഗോദ എന്നീ ചിത്രങ്ങൾക്ക് ശേഷം ബേസിൽ ജോസഫ് സംവിധാനം നിർവഹിക്കുന്ന ചിത്രം ബിഗ് ബഡ്‌ജറ്റിൽ ഒരുങ്ങുന്ന ഒരു സൂപ്പർഹീറോ ചിത്രമാണ്. പാൻ ഇന്ത്യൻ റിലീസ് ഉന്നം വെക്കുന്ന ചിത്രം മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലാണ് ഒരുങ്ങുന്നത്.

തൊണ്ണൂറുകളുടെ പശ്ചാത്തലത്തിൽ ഒരുങ്ങുന്ന ചിത്രത്തിൽ ടോവിനോയാണ് സൂപ്പർഹീറോയായി എത്തുന്നത്. ഇത്തരത്തിൽ ഒരു പ്രമേയം മലയാളത്തിൽ ആദ്യമായതിനാൽ തന്നെ പ്രേക്ഷകരും ഏറെ പ്രതീക്ഷയിലാണ്. ഹോളിവുഡ് സൂപ്പർഹീറോ ചിത്രങ്ങൾ പോലെ മിന്നൽ മുരളിയും ഒരു ഫ്രാഞ്ചൈസിയാക്കി ഒരുക്കുവാനാണ് നിർമാതാക്കൾ ശ്രമിക്കുന്നത്. ദി ക്യൂവിന് നൽകിയ അഭിമുഖത്തിൽ മിന്നൽ മുരളിക്ക് രണ്ടാം ഭാഗം ഉണ്ടാകുമെന്ന സൂചന നൽകിയിരിക്കുകയാണ് ടോവിനോ. അണിയറപ്രവർത്തകർ തികഞ്ഞ ആത്മവിശ്വാസത്തിലായതിനാൽ രണ്ടാം ഭാഗത്തിനുള്ള വർക്കുകളും തുടങ്ങിയെന്നാണ് അറിയുവാൻ കഴിയുന്നത്.

അരുൺ അനിരുദ്ധൻ, ജസ്റ്റിൻ മാത്യു എന്നിവർ ചേർന്ന് തിരക്കഥ ഒരുക്കുന്ന ചിത്രത്തിൽ ടോവിനോയെ കൂടാതെ ഗുരു സോമസുന്ദരം, അജു വർഗീസ്, ബൈജു സന്തോഷ്, ഹരിശ്രീ അശോകൻ, മാമുക്കോയ, പുതുമുഖമായ ഫെമിന ജോർജ് എന്നിവരും അഭിനയിക്കുന്നുണ്ട്. സമീർ താഹിർ ഛായാഗ്രഹണവും ഷാൻ റഹ്മാൻ സംഗീത സംവിധാനവും നിർവഹിക്കുന്ന മിന്നൽ മുരളിക്കായി സംഘട്ടനം ഒരുക്കിയിരിക്കുന്നത് ഹോളിവുഡ് സ്റ്റണ്ട് കൊറിയോഗ്രാഫർ വ്ലാഡ് റിംബർഗിന്റെ നേതൃത്വത്തിലുള്ള ടീമാണ്. വീക്കെൻഡ് ബ്ലോക്ക്ബസ്‌റ്റേഴ്‌സിന്റെ ബാനറിൽ സോഫിയ പോൾ നിർമിക്കുന്ന ചിത്രം ഓണം റിലീസാണ് ലക്ഷ്യമിട്ടിരിക്കുന്നത്.