“കളക്ഷന്‍ റെക്കോഡുകളോ കോടി ക്ലബുകളോ ഒരിക്കലും എന്റെ വിഷയമല്ല” ടോവിനോ തോമസ്

ഇന്ന് ഫാൻസുകാർ തമ്മിൽ ഏറ്റവുമധികം പ്രശ്‌നങ്ങൾ ഉരുത്തിരിയുന്നത് അവരുടെ പ്രിയതാരങ്ങളുടെ ചിത്രം നേടിയ കളക്ഷനും കോടി ക്ലബ്ബുകളുടെ പേരിലുമാണ്. ഓരോരുത്തരും അവരവർ ആരാധിക്കുന്ന താരം കൂടുതൽ കളക്ഷൻ നേടുമ്പോൾ അത് ആഘോഷിക്കുകയും മറ്റൊരു താരം അതിനേക്കാൾ അധികം നേടുമ്പോൾ അടുത്ത പടത്തിൽ കാണിച്ചു തരാമെന്ന് സോഷ്യൽ മീഡിയയിൽ വീമ്പിളക്കുന്നതും പ്രേക്ഷകർ സ്ഥിരം കാണുന്നതാണ്.

അത്തരം വാഗ്വാദങ്ങൾക്കിടയിൽ കളക്ഷൻ റെക്കോർഡുകളോ കോടി ക്ലബ്ബുകളോ തന്നെ അലട്ടുന്ന പ്രശ്‌നമല്ലെന്ന് തുറന്ന് പറഞ്ഞിരിക്കുകയാണ് ടോവിനോ തോമസ്. വനിതക്ക് നൽകിയ അഭിമുഖത്തിലാണ് താരം മനസ്സ് തുറന്നത്.

ഒരു സിനിമ ചെയ്യുമ്പോൾ ഞാന്‍ ആലോചിക്കുന്നത് മൂന്നു കാര്യങ്ങളാണ്. സിനിമയ്‌ക്കൊരു മിനിമം കലാമൂല്യം ഉണ്ടാകണം. എന്നെപ്പോലെ തന്നെ പ്രേക്ഷകര്‍ക്കും അതില്‍ എന്റര്‍ടെയ്ന്‍മെന്റ് വാല്യൂ കണ്ടെത്താന്‍ കഴിയണം. പണം മുടക്കുന്നവര്‍ക്ക് മുടക്കുമുതല്‍ എങ്കിലും തിരിച്ചുകിട്ടണം. അതിനപ്പുറത്തേക്ക് കളക്ഷന്‍ റെക്കോഡുകളോ കോടി ക്ലബുകളോ ഒരിക്കലും എന്റെ വിഷയമല്ല.

ഗ്യാപ്പില്ലാതെ സിനിമകള്‍ ചെയ്യുന്നുണ്ടെങ്കിലും മറ്റേതൊരു നടനും അയാളുടെ സിനിമക്ക് കൊടുക്കുന്ന സമയവും തയാറെടുപ്പുകളും ഞാനും കൊടുക്കാറുണ്ട്. ലുക്കിലും ബോഡിയിലുമെല്ലാം ആവശ്യമായ മേക്കോവറുകള്‍ വരുത്തും. ഗപ്പിയില്‍ കണ്ട ടൊവീനോയെ ആണോ നിങ്ങള്‍ ഗോദയില്‍ കണ്ടത്? ലൂക്കയിലെ ലുക്കിലാണോ ഞാന്‍ കല്‍ക്കിയില്‍ വന്നത്? ഇതുവരെ ചെയ്ത 32 കഥാപാത്രങ്ങളും ഉള്ളില്‍ തന്നെയുണ്ട്. ഇപ്പോഴും മായാനദി കാണുമ്പോൾ ഞാന്‍ മാത്തനാകും. ഗപ്പി കാണുമ്പോൾ തേജസ് വര്‍ക്കിയാകും. തീവണ്ടി കാണുമ്പോൾ ബിനീഷാകും. ഈ കഥാപാത്രങ്ങളിലെല്ലാം ഞാനുണ്ട്.