“ഏതൊരു പെണ്ണും ആഗ്രഹിക്കുന്ന ഒരാൺതുണ എനിക്കും വേണം” ആദ്യ ട്രാൻസ്ജെൻഡർ നായിക അഞ്‌ജലി അമീർ

മലയാള സിനിമയിലെ ആദ്യ ട്രാൻസ്ജെൻഡർ നായിക എന്ന ബഹുമതിക്ക് ഉടമയാണ് അഞ്ജലി അമീർ. ഈയടുത്ത് ബിഗ് ബോസിലും താരം മുഖം കാണിച്ചിരുന്നു. മമ്മൂട്ടി നായകനായ തമിഴ് ചിത്രം പേരൻപിൽ ഗംഭീര പ്രകടനമാണ് അഞ്ജലി അമീർ കാഴ്ചവെച്ചത്. ഇപ്പോഴിതാ തനിക്കും ഒരു ആൺതുണ വേണമെന്ന് താരം. സോഷ്യൽ മീഡിയയിലൂടെയാണ്‌ അഞ്ജലി ഇക്കാര്യം വെളിപ്പെടുത്തിയത്. ലിവിങ് ടുഗെദറിൽ കൂടെയുണ്ടായിരുന്ന ആൾ തന്നെ ചതിച്ചെന്നും ഭീഷണിപ്പെടുത്തുന്നുവെന്നും പറഞ്ഞ് നേരത്തെ അഞ്ജലി വാർത്തകളിൽ ഇടംപിടിച്ചിരുന്നു.

ഒറ്റയ്ക്ക് തുഴഞ്ഞ് മടുത്തു, മുങ്ങിപ്പോകുമെന്നൊരു ഭയം, ഒരു തുഴക്കാരനെ കൂടെ കൂട്ടാൻ മോഹമായി തുടങ്ങി. എന്നെ സ്നേഹിക്കാനും എനിക്ക് സ്നേഹിക്കാനും ഒരാണ് വേണം, കുരുത്തക്കേടിന് കുടപിടിക്കാനും ഇടക്ക് രണ്ട് തെറി വിളിക്കാനും,മഴ പെയ്യുമ്പോൾ വണ്ടിയെടുത്ത് കറങ്ങാനും അരണ്ട വെളിച്ചത്തിൽ തട്ട് ദോശ കഴിക്കാനും കൂടെയൊരുത്തൻ.ഏതൊരു പെണ്ണും ആഗ്രഹിക്കുന്ന ഒരാൺതുണ എനിക്കും വേണം, ജീവിതയാത്രയിൽ എന്നെ കൂടെക്കൂട്ടാൻ ധൈര്യമുളളവരുണ്ടോ ആവോ?