‘എടപ്പാൾ ഓട്ടം സിനിമയിലും’, പെട്ടെന്നാരും പറയാന്‍ ധൈര്യപ്പെടാത്ത പ്രമേയമാണ് ‘രണ്ട്’ സിനിമയെന്ന് വിസി അഭിലാഷ്

കഴിഞ്ഞദിവസമാണ് രണ്ട് സിനിമ തിയറ്ററുകളിൽ റിലീസ് ആയത്. എല്ലാവരും കണ്ടിരിക്കേണ്ട ഒരു ചിത്രമാണ് രണ്ട് സിനിമയെന്ന് സംവിധായകൻ വി സി അഭിലാഷ്. ഫേസ്ബുക്കിൽ പങ്കുവെച്ച കുറിപ്പിലാണ് അഭിലാഷ് ഇങ്ങനെ പറഞ്ഞത്. ഈ കാലഘട്ടത്തിന് ആവശ്യമുള്ള സിനിമ. പെട്ടെന്നാരും പറയാൻ ധൈര്യപ്പെടാത്ത പ്രമേയം. വിഷ്ണുവുൾപ്പെടെ ഒട്ടു മിക്ക അഭിനേതാക്കളും നാച്ചുറലായി പെർഫോം ചെയ്തു. ആദ്യസിനിമയെന്ന് തോന്നാത്ത വിധം സംവിധായകന്റെ സിനിമ. – രണ്ട് സിനിമയെക്കുറിച്ച് വിസി അഭിലാഷ് കുറിച്ചത് ഇങ്ങനെ. മതരാഷ്ട്രീയത്തെ നിശിതമായി വിമര്‍ശിക്കുന്ന ചിത്രമാണ് രണ്ട്.

ശബരിമല വിഷയവുമായി ബന്ധപ്പെട്ട് സംഘര്‍ഷങ്ങൾ ഉണ്ടായ സമയത്ത് ഹര്‍ത്താലിനിടെ എടപ്പാള്‍ ജംഗ്ഷനില്‍ ബൈക്കുകള്‍ ഉപേക്ഷിച്ച് സംഘപരിവാര്‍ പ്രവര്‍ത്തകര്‍ കൂട്ടത്തോടെ ഓടിയത് ‘എടപ്പാള്‍ ഓട്ടം’ എന്ന പേരില്‍ ട്രോള്‍ ആയി മാറിയിരുന്നു. ഈ ഓട്ടത്തെയും സിനിമയിൽ പരാമർശിക്കുന്നുണ്ട്.

ഹിന്ദുത്വ രാഷ്ട്രീയം പിന്തുടരുന്ന കെ ജി പി എന്ന രാഷ്ട്രീയ പാര്‍ട്ടിയുടെ നേതാവ് നളിനന്‍ തന്നെയാണ് ഇതില്‍ എടപ്പാള്‍ മോഡല്‍ ഓട്ടം നടത്തുന്നത്. ടിനി ടോം ആണ് നളിനന്‍ എന്ന കഥാപാത്രമായി ചിത്രത്തിൽ എത്തുന്നത്. എല്ലാ മനുഷ്യരെയും ഒരുപോലെ കാണാന്‍ ശ്രമിക്കുന്ന വാവ എന്ന ചെറുപ്പക്കാരനായ നാട്ടിന്‍പുറത്തുകാരന്റെ ജീവിതത്തിലൂടെയുള്ളൊരു സഞ്ചാരമാണ് രണ്ട്. ചിത്രത്തിൽ നായികയായി എത്തുന്നത് അന്ന രേഷ്മ രാജനാണ്.
ഇര്‍ഷാദ്, കലാഭവന്‍ റഹ്‌മാന്‍, സുധി കോപ്പ, ബാലാജി ശര്‍മ്മ, ഗോകുലന്‍, ജയശങ്കര്‍, കോബ്ര രാജേഷ്, ശ്രീലക്ഷ്മി, മാല പാര്‍വതി, മറീന മൈക്കിള്‍, പ്രീതി എന്നിവരാണ് ചിത്രത്തിലെ മറ്റു താരങ്ങള്‍.