പൂജയുടെ വൈൻ ആന്റിയായി തീരുമാനിച്ചത് ഈ മുഖം.. കഥ പറച്ചിൽ ഏറ്റില്ല; ജൂഡ് ആന്റണി ജോസഫ്

മലയാള സിനിമയിലെ നായികസങ്കല്പങ്ങളെ തച്ചുടച്ച ചിത്രമാണ് ജൂഡ് ആന്റണി ജോസഫ് സംവിധാനം നിർവഹിച്ച ഓം ശാന്തി ഓശാന. മിഥുൻ മാനുവൽ തോമസ് തിരക്കഥ ഒരുക്കിയ ചിത്രത്തിൽ നിവിൻ പോളി, നസ്രിയ എന്നിവരെ പ്രധാന കഥാപാത്രങ്ങളെ അവതരിപ്പിച്ചത്. നായികയുടെ പിന്നാലെ നടക്കുന്ന നായകൻ എന്ന ക്ളീഷേ സമ്പ്രദായത്തെ തല്ലിയോടിച്ച ചിത്രത്തിൽ നായകന്റെ പിന്നാലെ നടക്കുന്ന നായിക എന്ന ആശയമാണ് അവതരിപ്പിച്ചത്. മനോഹരമായ ഗാനങ്ങളും ഏച്ചുക്കെട്ടില്ലാത്ത തമാശകളും ഗിരി – പൂജ പ്രണയത്തെ വൻ വിജയമാക്കി തീർത്തു. വിനീത് ശ്രീനിവാസൻ, അജു വർഗീസ്, രഞ്ജി പണിക്കർ തുടങ്ങിയവരും അവരുടെ റോളുകൾ മനോഹരമാക്കി. അതേ പോലെ തന്നെ ചിത്രത്തിൽ ഏറെ ശ്രദ്ധിക്കപ്പെട്ട ഒരു കഥാപാത്രമാണ് വിനയപ്രസാദ് അവതരിപ്പിച്ച പൂജയുടെ വൈൻ ആന്റി എന്ന കഥാപാത്രം. ആ റോളിനായി ആദ്യം മനസ്സിലുണ്ടായിരുന്നതും കഥ പറഞ്ഞതും നിയുക്ത ആരോഗ്യമന്ത്രി വീണ ജോർജിനോടാണെന്ന് വെളിപ്പെടുത്തിയിരിക്കുകയാണ് സംവിധായകൻ.

ഓം ശാന്തി ഓശാനയിലെ വൈൻ ആന്റി ആകാൻ ഞാൻ മനസ്സിൽ ആഗ്രഹിച്ചത് ഈ മുഖമാണ്. അന്ന് മാം ഇന്ത്യ വിഷനിൽ ജോലി ചെയ്യുന്നു. അന്ന് നമ്പർ തപ്പിയെടുത്തു വിളിച്ചു കാര്യം പറഞ്ഞു. നേരെ ഇന്ത്യാ വിഷനിൽ ചെന്ന് കഥ പറഞ്ഞു. അന്ന് ബോക്സ് ഓഫിസ് എന്ന പ്രോഗ്രാം ചെയ്യുന്ന മനീഷേട്ടനും ഉണ്ടായിരുന്നു കഥ കേൾക്കാൻ , എന്റെ കഥ പറച്ചിൽ ഏറ്റില്ല . സ്നേഹപൂർവ്വം അവരതു നിരസിച്ചു . അന്ന് ഞാൻ പറഞ്ഞു ഭാവിയിൽ എനിക്ക് തോന്നരുതല്ലൊ അന്ന് പറഞ്ഞിരുന്നെങ്കിൽ, മാം ആ വേഷം ചെയ്തേനെ എന്ന് . ഇന്ന് കേരളത്തിന്റെ നിയുക്ത ആരോഗ്യമന്ത്രി . പൂജയുടെ ജനിക്കാതെ പോയ വൈൻ ആന്റി . അഭിനന്ദനങ്ങൾ മാം . മികച്ച പ്രവർത്തനം കാഴ്ച വക്കാനാകട്ടെ ☺️☺️☺️