ധ്യാനിന്റെ പിറന്നാൾ ദിവസം ‘വർഷങ്ങൾക്ക് ശേഷം’ പാക്കപ്പ് ചെയ്ത് വിനീത് ശ്രീനിവാസൻ, 40 ദിവസം കൊണ്ട് ഷൂട്ട് നടന്നത് 50ലധികം ലൊക്കേഷനുകളിൽ

സംവിധായകൻ വിനീത് ശ്രീനിവാസൻ ഒരുക്കുന്ന ഏറ്റവും പുതിയ ചിത്രമാണ് വർഷങ്ങൾക്ക് ശേഷം. പ്രണവ് മോഹൻലാൽ, ധ്യാൻ ശ്രീനിവാസൻ, കല്യാണി പ്രിയദർശൻ, അജു വർഗീസ്, ബേസിൽ ജോസഫ്, നിവിൻ പോളി തുടങ്ങി വലിയ യുവതാരനിര അണിനിരക്കുന്ന ചിത്രത്തിന്റെ ഷൂട്ടിംഗ് അവസാനിച്ചു. 40 ദിവസം നീണ്ടു നിന്ന ഷൂട്ടിംഗ് 50 ലധികം ലൊക്കേഷനുകളിലായാണ് ചിത്രീകരണം പൂർത്തിയാക്കിയത്. വിനീത് ശ്രീനിവസൻ സോഷ്യൽ മീഡിയയിലൂടെ ചിത്രം പാക്ക് അപ്പ് ആയ സന്തോഷം ആരാധകരുമായി പങ്കുവെച്ചു.

‘ഇന്ന് പുലർച്ചെ രണ്ടു മണിക്ക്, ധ്യാനിന്റെ പിറന്നാൾ ദിവസം, ഞങ്ങൾ വർഷങ്ങൾക്ക് ശേഷം സിനിമയുടെ ഷൂട്ടിംഗ് പൂർത്തിയാക്കി. ചെയ്യുന്ന കാര്യങ്ങളിൽ അഭിനിവേശമുള്ള ഒരു കൂട്ടം ആളുകളെ എനിക്ക് ലഭിച്ചതിന് എനിക്ക് ദൈവത്തോട് നന്ദിയുണ്ട്. എല്ലാ കാര്യങ്ങളും കൃത്യമായി ആസൂത്രണം ചെയ്താൽ സിനിമ ഒരുക്കുന്നത് എത്ര മനോഹരമാണെന്ന് ഞാൻ തിരിച്ചറിഞ്ഞ സിനിമയാണിത്. നിങ്ങൾ വെളിച്ചത്തെയും പ്രകൃതിയെയും ബഹുമാനിക്കുമ്പോൾ അത് വിലമതിക്കാനാവാത്ത ഒന്ന് നിങ്ങൾക്ക് നൽകും. എന്നെ സംബന്ധിച്ച് ഇതെല്ലാം വീണ്ടും തിരിച്ചറിഞ്ഞ സിനിമ ആയിരുന്നു വർഷങ്ങൾക്ക് ശേഷം.’ – വിനീത് ശ്രീനിവാസൻ കുറിച്ചു.

2024 ഏപ്രിലിൽ ചിത്രം റിലീസ് ചെയ്യുമെന്നും ഫസ്റ്റ് ലുക്ക് പോസ്റ്റർ ഇന്നു തന്നെ റിലീസ് ചെയ്യുമെന്നും വിനീത് സോഷ്യൽ മീഡിയയിലൂടെ അറിയിച്ചു. മെറിലാൻഡ് സിനിമാസിന്റെ ബാനറിൽ വിശാഖ് സുബ്രഹ്മണ്യമാണ് ചിത്രം നിർമിക്കുന്നത്. ചിത്രത്തിൽ നിവിൻ പോളി അതിഥി കഥാപാത്രമായാണ് എത്തുക. ധ്യാൻ ശ്രീനിവാസൻ, അജു വർഗീസ്, കല്യാണി പ്രിയദർശൻ, ബേസിൽ ജോസഫ്, വിനീത് ശ്രീനിവാസൻ, നീരജ് മാധവ്, നീതാ പിള്ള, അർജുൻ ലാൽ, നിഖിൽ നായർ, ഷാൻ റഹ്മാൻ എന്നിവരാണ് വർഷങ്ങൾക്ക് ശേഷം സിനിമയിലെ മറ്റ് കഥാപാത്രങ്ങളെ അവതരിപ്പിക്കുന്നത്. മെറിലാൻഡ് സിനിമാസാണ് ചിത്രം തിയേറ്ററുകളിൽ എത്തിക്കുക.