ബറോസിലൂടെ അച്ഛന്റെ സഹസംവിധായകയായി ലാലേട്ടന്റെ മകൾ വിസ്മയ സിനിമ രംഗത്തേക്ക്

താരപുത്രർ സിനിമ രംഗത്തേക്ക് കടന്ന് വരുന്നത് അത്ര പുതിയ കാര്യമൊന്നുമല്ല. മലയാളത്തിൽ നിരവധി താരപുത്രർ പല മേഖലകളിലായി അവരുടെ കഴിവ് തെളിയിച്ചിട്ടുണ്ട്. അതിലൊരാളാണ് ലാലേട്ടന്റെ മകൻ പ്രണവ്. ബാലതാരമായി എത്തി പിന്നീട് സഹസംവിധായകനായും പ്രവർത്തിച്ചിട്ടുള്ള പ്രണവ് രണ്ടു പടത്തിൽ നായകനായി അഭിനയിച്ചു കഴിഞ്ഞു. ഇപ്പോൾ മൂന്നാമത്തെ ചിത്രമായ വിനീത് ശ്രീനിവാസന്റെ സംവിധാനത്തിൽ ഒരുങ്ങുന്ന ഹൃദയത്തിന്റെ വർക്കുകൾ കൊറോണ കാരണം മുടങ്ങിയിരിക്കുകയാണ്. പ്രണവിനെ പോലെ തന്നെ ലാലേട്ടന്റെ മകളായ വിസ്മയയും സിനിമ ലോകത്തേക്ക് കടന്നു വരികയാണ്.

മോഹൻലാൽ ആദ്യമായി സംവിധാനം നിർവഹിക്കുന്ന ബറോസിൽ അച്ഛന്റെ അസിസ്റ്റന്റ് ആയിട്ടാണ് വിസ്‌മയ സിനിമ രംഗത്തേക്ക് കടന്നു വരുന്നത് എന്നാണറിയുവാൻ കഴിയുന്നത്. കീർത്തി സുരേഷിന്റെ സഹോദരി രേവതിയും ചിത്രത്തിൽ സഹസംവിധായകയാണ്. രേവതി മരക്കാർ അറബിക്കടലിന്റെ സിംഹത്തിൽ സഹസംവിധായകയായിരുന്നു.

ലോകനിലവാരത്തിലുള്ള ഒരു ത്രീഡി ചിത്രമായിട്ടാണ് ബറോസ് ഒരുങ്ങുന്നത്. ചിത്രത്തിന്റെ തിരക്കഥ രചിക്കുന്നത് നവോദയ ജിജോ ആണ്. ചിത്രം പറയുന്നത് ലോകത്തിന്റെ നാനാഭാഗത്തുനിന്നുമെത്തിച്ച വാസ്കോ ഡ ഗാമയുടെ രത്നങ്ങളുടെയും സുവർണ നിധികളുടെയും കാവൽക്കാരനായ ബറോസിന്റെ കഥയാണ്. ബറോസിന് ക്യാമറ ചലിപ്പിക്കുന്നത് കെ.യു. മോഹനൻ ആണ്. ചിത്രത്തിന്റെ സംഗീതം നിർവഹണം ലോകപ്രശസ്ത സംഗീതഞ്ജനായ പതിമൂന്നുകാരൻ ലിഡിയന്‍ നാദസ്വരമാണ്. എന്നാൽ കൊറോണ ഭീതി പടരുന്ന ഈ സാഹചര്യത്തിൽ ഈ ചിത്രത്തിന്റെ ഷൂട്ടിംഗ് ഈ വർഷം അവസാനമോ അടുത്ത വർഷം ആദ്യമോ തുടങ്ങാനാണ് മോഹൻലാൽ പ്രതീക്ഷിക്കുന്നത്. അതിനു മുൻപ് രണ്ടു മലയാള ചിത്രങ്ങളിൽ അഭിനയിക്കാനാണ് അദ്ദേഹത്തിന്റെ തീരുമാനം.