പതിവ് ശൈലിയിൽ നിന്ന് മാറി വൈശാഖ്; നൈറ്റ് ഡ്രൈവിന് മികച്ച റിപ്പോർട്ട്; അപ്പോൾ മോൺസ്റ്റർ ഞെട്ടിക്കുമെന്ന് ആരാധകർ

മാസ്സ് മസാല എന്റർടൈനർ ചിത്രങ്ങളുടെ ലിസ്റ്റ് എടുത്താൽ മലയാളി പ്രേക്ഷകരുടെ മനസ്സിലേക്ക് ഓടി വരുന്ന ഒരു സംവിധായകന്റെ പേരാണ് വൈശാഖ്. പോക്കിരി രാജ, സീനിയേഴ്സ്, മല്ലൂസിംഗ്, സൗണ്ട് തോമ, വിശുദ്ധൻ, കസിൻസ് എന്നിവയാണ് വൈശാഖ് സംവിധാനം ചെയ്ത സിനിമകൾ. എബി എബ്രഹാം എന്ന യഥാർത്ഥ പേര്, സിനിമയിൽ വന്നതിനു ശേഷം വൈശാഖ് എന്നു മാറ്റുകയായിരുന്നു. സംവിധാന സഹായി ആയി 2005 മുതൽ തന്നെ വൈശാഖ് രംഗത്തുണ്ട്. വൈശാഖിന്റെ ഏഴാമത് സിനിമയായ പുലിമുരുകൻ ആണ് മലയാളം സിനിമയിലെ ₹100 കോടി (US$16 million) വരുമാനം കവിഞ്ഞ ആദ്യസിനിമ. തുടർന്നു വന്ന മധുരരാജയും മികച്ച വിജയം കുറിച്ചിരുന്നു.

ഇവയിൽ വിശുദ്ധൻ മാത്രമാണ് വൈശാഖ് തന്റെ പതിവ് ശൈലിയിൽ നിന്നും മാറി ഒരുക്കിയ ചിത്രം. മികച്ച പ്രതികരണമാണ് ചിത്രത്തിന് ലഭിച്ചത്. ഇന്നിപ്പോൾ അദ്ദേഹത്തിന്റെ മറ്റൊരു വ്യത്യസ്ഥ ചിത്രമായ നൈറ്റ് ഡ്രൈവ് തീയറ്ററുകളിൽ റിലീസിന് എത്തിയിരിക്കുകയാണ്. മികച്ച റിപ്പോർട്ടാണ് ചിത്രത്തിന് ലഭിച്ചുക്കൊണ്ടിരിക്കുന്നത്. ഒരു രാത്രിയിൽ സംഭവിക്കുന്ന കഥയാണ് നൈറ്റ് ഡ്രൈവ്. ഒരു യഥാർത്ഥ സംഭവത്തെ ആസ്പദമാക്കിയാണ് ഈ സിനിമ രചിച്ചിരിക്കുന്നത്. അഭിലാഷ് പിള്ളയാണ് തിരക്കഥ. വൈശാഖിന്റെ കരിയറിലെ മുഴുനീള ത്രില്ലർ ചിത്രം കൂടിയാണ് നൈറ്റ് ഡ്രൈവ്.

വില പിടിപ്പുള്ള താരങ്ങളോ വമ്പൻ ബജറ്റോ ഇല്ലാത്ത ചിത്രത്തിൽ യുവതാരങ്ങളായ റോഷൻ മാത്യുവും അന്ന ബെന്നുമാണ് കേന്ദ്രകഥാപാത്രങ്ങളായി എത്തുന്നത്. ഒപ്പം ഇന്ദ്രജിത്ത് സുകുമാരനും ഒരു പ്രധാന വേഷത്തിൽ എത്തുന്നു എന്ന പ്രത്യേകതയും നൈറ്റ് ഡ്രൈവിനുണ്ട്. പ്രേക്ഷകനെ പൂർണമായും എൻഗേജിങ് ആക്കുന്ന ചിത്രമാണ് നൈറ്റ് ഡ്രൈവ് എന്നാണ് കണ്ടിറങ്ങിയ പ്രേക്ഷകർ അഭിപ്രായപ്പെടുന്നത്.

നൈറ്റ് ഡ്രൈവിന് മികച്ച അഭിപ്രായം ലഭിച്ചതോടെ വൈശാഖ് – മോഹൻലാൽ കൂട്ടുകെട്ട് ഒന്നിക്കുന്ന മോൺസ്റ്ററിന് കൂടുതൽ പ്രതീക്ഷയേകിയിരിക്കുകയാണ് ആരാധകർ. ചിത്രത്തിൽ ലക്കി സിംഗ് എന്ന കഥാപാത്രമായാണ് മോഹൻലാൽ എത്തുന്നത്. സിഖ് വേഷത്തിലാണ് ഫസ്റ്റ് ലുക്ക് പോസ്റ്ററിൽ മോഹൻലാൽ പ്രത്യക്ഷപ്പെടുന്നത്. മലയാളത്തിൽ ഇന്നുവരെ പരീക്ഷിച്ചിട്ടില്ലാത്ത ഒരു പ്രമേയമാണ് ചിത്രത്തിലേത് എന്നാണ് അറിയുവാൻ സാധിക്കുന്നത്. സോമ്പി സിനിമയാണെന്നും ലെസ്ബിയൻ രംഗങ്ങൾ ചിത്രത്തിൽ ഉണ്ടെന്നെല്ലാം അഭ്യൂഹങ്ങളുണ്ട്. ചിത്രത്തിന്റെ കഥയും തിരക്കഥയും സംഭാഷണവും ഉദയകൃഷ്ണയാണ്.ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ‘മോൺസ്റ്റർ’ നിർമിക്കുന്നത്. ഒടിടി റിലീസിന് ഒരുങ്ങുന്ന ചിത്രത്തിൽ ലക്ഷ്‌മി മഞ്ചു, ഹണി റോസ്, സുദേവ് നായർ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നുണ്ട്.