വേഫെറർ ഫിലിംസ് തമിഴിലേക്ക്, കിംഗ് ഓഫ് കൊത്തയ്ക്ക് ശേഷം ബിഗ് ബജറ്റ് ചിത്രവുമായി ദുൽഖർ

മലയാളത്തിൽ പ്രാഗത്ഭ്യം തെളിയിച്ച് തമിഴിലേക്ക് വേഫെറർ ഫിലിംസ്. നടൻ ദുൽഖർ സൽമാന്റെ നേതൃത്വത്തിലുള്ള വേഫെറർ ഫിലിംസിന്റെ അടുത്ത ചിത്രം തമിഴിലാണ്. കിംഗ് ഓഫ് കൊത്തയ്ക്ക് ശേഷം ദുൽഖർ സൽമാൻ നിർമിക്കുന്ന ഈ തമിഴ് ചിത്രം ബിഗ് ബജറ്റിലാണ് ഒരുങ്ങുന്നത് എന്നാണ് റിപ്പോർട്ടുകൾ. എന്നാൽ, ഈ ചിത്രം ആരാണ് സംവിധാനം ചെയ്യുന്നത് അഭിനേതാക്കൾ ആരെല്ലാമാണ് എന്നത് സംബന്ധിച്ച വിശദാംശങ്ങൾ പുറത്തുവിട്ടിട്ടില്ല. ചിത്രത്തിൽ ദുൽഖർ തന്നെ ആയിരിക്കും നായകനായി എത്തുകയെന്നും റിപ്പോർട്ടുകളുണ്ട്.

ദുൽഖർ സൽമാന്റെ നേതൃത്വത്തിലുള്ള വേഫെറർ ഫിലിംസിന്റെ ബാനറിൽ പ്രദർശനത്തിന് എത്തിയ ചിത്രങ്ങൾ വരനെ ആവശ്യമുണ്ട്, മണിയറയിലെ അശോകൻ എന്നീ ചിത്രങ്ങൾ ആയിരുന്നു. കുപ്രസിദ്ധ കുറ്റവാളി സുകുമാരക്കുറിപ്പിന്റെ കഥ പറഞ്ഞ കുറുപ്പ്, ഷൈൻ ടോം ചാക്കോ നായകനായി എത്തിയ അടി, സല്യൂട്ട് എന്നിവ വേഫെറർ ഫിലിംസിന്റെ നിർമാണത്തിൽ ഒരുങ്ങിയ ചിത്രങ്ങളാണ്. കിംഗ് ഓഫ് കൊത്തയാണ് ഈ പട്ടികയിലെ ഏറ്റവും അടുത്തതായുള്ള ചിത്രം.

നിർമാണരംഗത്ത് മാത്രമല്ല വിതരണരംഗത്തും വേഫെറർ ഫിലിംസ് അവരുടെ സാന്നിധ്യം അറിയിച്ചിട്ടുണ്ട്. അരുൺ വൈഗ സംവിധാനം ചെയ്ത ഉപചാരപൂർവം ഗുണ്ടജയൻ എന്ന സിനിമ വിതരണത്തിന് എത്തിച്ചാണ് വിതരണരംഗത്തേക്ക് വേഫെറർ ഫിലിംസ് എത്തിയത്. കഴിഞ്ഞയിടെ മമ്മൂട്ടി കമ്പനി ന‍ിർമിച്ച നൻപകൽ നേരത്ത് മയക്കം എന്ന മമ്മൂട്ടി ചിത്രം വിതരണത്തിന് എത്തിച്ചത് വേഫെറർ ഫിലിംസ് ആയിരുന്നു.