ഫോർട്ട് കൊച്ചിയിലെ വഴിയിലൂടെ അന്ധനായി യാത്ര ചെയ്ത് പൃഥ്വിരാജ്, അന്ധാദുനി’നെക്കാൾ മികച്ചതാകുമോ ഭ്രമം ?

മലയാളത്തിന്റെ സ്വന്തം പൃഥ്വിരാജ് സുകുമാരൻ ഫോർട്ട് കൊച്ചിയിലെ വഴികളിലൂടെ അന്ധനായി  യാത്ര ചെയ്യുന്ന ചിത്രങ്ങളാണ് ട്വിറ്ററിലും ഫേസ്ബുക്കിലും തരംഗമായി കൊണ്ടിരിക്കുന്നത്. പ്രശസ്ത ഛായാഗ്രാഹകൻ രവി.കെ.ചന്ദ്രൻ സംവിധാനം ചെയ്യുന്ന ഭ്രമം എ്‌ന സിനിമയിലെ ഫോട്ടോകളാണ് സോഷ്യൽ മീഡിയിൽ പ്രചരിക്കുന്നത്. ബോളിവുഡിൽ ഏറെ ചർച്ച ചെയ്യപ്പെട്ട ത്രില്ലർ ‘അന്ധാദുൻ’ മലയാളം റീമേക്കാണ് ഭ്രമം. ആയുഷ്മാൻ ഖുരാന അവതരിപ്പിച്ച അന്ധനായ പിയാനോ പ്ലേയറുടെ റോളിലാണ് പൃഥ്വിരാജ്. ബോളിവുഡിലെ മുൻനിര സംവിധായകൻ ശ്രീറാം രാഘവനാണ് അന്ധാദുൻ സംവിധാനം ചെയ്തിരിക്കുന്നത്. മലയാളം പതിപ്പിൽ ക്യാമറയും രവി.കെ.ചന്ദ്രനാണ്.

പൃഥ്വിരാജ് സുകുമാരനെ കൂടാതെ ഉണ്ണി മുകുന്ദൻ, മംമ്ത മോഹൻദാസ് എന്നിവരും ചിത്രത്തിലുണ്ട്. എ പി ഇന്റർനാഷണലിന്റെ ബാനറിലാണ് ചിത്രം ഒരുങ്ങുന്നത്. ശങ്കർ, ജഗദീഷ്, സുധീർ കരമന, രാശി ഖന്ന, സുരഭി ലക്ഷ്മി, അനന്യ തുടങ്ങിയവരാണ് മറ്റ് താരങ്ങൾ. ശരത് ബാലൻ തിരക്കഥയും സംഭാഷണവും ഒരുക്കുന്നു. ജെക്‌സ് ബിജോയിയുടേതാണ് സംഗീതം. എഡിറ്റിംഗ് – ശ്രീകർ പ്രസാദ്, കല – ദിലീപ് നാഥ്, കോസ്റ്റ്യൂം ഡിസൈനർ – അക്ഷയ പ്രേമനാഥ്, അസ്സോസിയേറ്റ് ഡയറക്ടർ – ജിത്തു അഷ്റഫ്, സൂപ്പർവൈസിങ് പ്രൊഡ്യൂസർ – അശ്വതി നടുത്തൊടി, പ്രൊഡക്ഷൻ കൺട്രോളർ – ജിനു പി കെ, സ്റ്റീൽസ് – ബിജിത് ധർമ്മടം, മേക്കപ്പ് – റോണക്‌സ് സേവ്യർ, എക്സിക്യൂട്ടീവ് പ്രൊഡ്യൂസർ – ഓപ്പൺ ബുക്ക് പ്രൊഡക്ഷൻ, ടൈറ്റിൽ ഡിസൈൻ – ആനന്ദ് രാജേന്ദ്രൻ, പ്രൊഡക്ഷൻ എക്‌സിക്യൂട്ടീവ് – ഷൈൻ, പ്രൊഡക്ഷൻ മാനേജർ – പ്രിൻസ്, വാട്ട്‌സൺ.

തനു ബാലക് സംവിധാനം ചെയ്യുന്ന ‘കോൾഡ് കേസ്’, മനു വാര്യർ സംവിധാനം ചെയ്യുന്ന ‘കുരുതി’ എന്നിവയാണ് അടുത്തിടെ ചിത്രീകരണം പൂർത്തിയായ പൃഥ്വിരാജ് ചിത്രങ്ങൾ. പൃഥ്വിരാജ് – സുരാജ് വെഞ്ഞാറമൂട് ചിത്രം ‘ജനഗണമന’യുടെ ടീസർ കഴിഞ്ഞ ദിവസം പുറത്ത് വന്നിരുന്നു. തെലുങ്കിലും തമിഴിലും ‘അന്ധാദുൻ’ റീമേക്ക് ഒരുങ്ങുന്നുണ്ട്. തമിഴിൽ പ്രശാന്ത് ത്യാഗരാജനാണ് നായകൻ.’ദ പിയാനോ ട്യൂണർ’ എന്ന ഫ്രഞ്ച് ഷോർട്ട് ഫിലിം ആധാരമാക്കി ഒരുക്കിയ ‘അന്ധാ ദുൻ’ സമീപകാലത്ത് ഏറെ ചർച്ചയായ ഇന്ത്യൻ ത്രില്ലർ കൂടിയാണ്. 2018ൽ റിലീസ് ചെയ്ത അന്ധാദുൻ ബോക്സ് ഓഫീസിലും മികച്ച പ്രകടനം കാഴ്ച വച്ചിരുന്നു. ആയുഷ്മാൻ ഖുറാനക്ക് അഭിനയത്തിന് ദേശീയ അവാർഡും ലഭിച്ചു. ദേശീയ അവാർഡിൽ മികച്ച ഹിന്ദി സിനിമയായും തെരഞ്ഞെടുക്കപ്പെട്ടു. ഫിലിം ഫെയറിൽ മികച്ച ചിത്രം, സംവിധാനം ഉൾപ്പെടെ ആറ് അവാർഡുകൾ ‘അന്ധാദുൻ’ നേടിയിരുന്നു.