‘ഫാസ്റ്റ് ഫുഡ് ബ്ലാക്ക് ലിസ്റ്റിൽ; ബ്യൂട്ടി പാർലറിൽ പോകാറില്ല’ – സൗന്ദര്യരഹസ്യം വെളിപ്പെടുത്തി യുവകൃഷ്ണ

സീരിയലുകളിലൂടെ മലയാളി പ്രേക്ഷകരുടെ മനസിൽ കുടിയേറിയ താരമാണ് യുവകൃഷ്ണ. ‘മഞ്ഞിൽ വിരിഞ്ഞ പൂവ്’ എന്ന സീരിയലിലെ മനു പ്രതാപ് എന്ന കഥാപാത്രത്തിലൂടെയാണ് യുവ കൃഷ്ണ പ്രേക്ഷകർക്ക് പ്രിയങ്കരനായത്. അൽപം വില്ലത്തരം കൈയിലുണ്ടെങ്കിലും യുവകൃഷ്ണയെ കുടുംബ പ്രേക്ഷകർ വളരെ പെട്ടെന്നാണ് സ്വീകരിച്ചത്. അഭിനയം കൊണ്ടു മാത്രമല്ല ശരീരസൗന്ദര്യം കൊണ്ടും കുടുംബമനസുകളിൽ ഒരിടം സ്വന്തമാക്കി കഴിഞ്ഞു.

കൗമാരപ്രായം മുതലേ ശരീരസൗന്ദര്യത്തിൽ ശ്രദ്ധിക്കുന്ന വ്യക്തിയാണ് യുവകൃഷ്ണ. മത്സരങ്ങൾക്കും ഷോകൾക്കും ഒക്കെയായി ബോഡി ഒരുക്കുന്നത് ഒരു ത്രില്ലാണെന്നാണ് യുവതാരം പറയുന്നത്. പത്താം ക്ലാസ് കഴിയുമ്പോഴേ താരം വർക് ഔട്ട് തുടങ്ങിയിരുന്നു. ആ കാലത്ത് സ്കൂൾ വിട്ടു വന്നാൽ ഒരു മണിക്കൂറോളം വർക് ഔട്ട് ചെയ്യുമായിരുന്നു എന്നും താരം പറഞ്ഞു. മത്സരങ്ങൾ ഇല്ലാത്തപ്പോൾ കർശനമായ ഭക്ഷണനിയന്ത്രണങ്ങൾ ഒന്നുമില്ലെങ്കിലും താൻ അത്ര ഭക്ഷണപ്രിയനൊന്നുമല്ലെന്നാണ് യുവകൃഷ്ണ പറയുന്നത്. വറുത്ത ഭക്ഷണവും ഫാസ്റ്റ് ഫുഡും തന്റെ ബ്ലാക്ക് ലിസ്റ്റിലാണെന്നും വല്ലപ്പോഴും രുചിച്ചു നോക്കാറുണ്ടെന്നും യുവകൃഷ്ണ വ്യക്തമാക്കി.

കേരള യൂണിവേഴ്സിറ്റിയിൽ എം ബി എ ചെയ്യുന്ന സമയത്താണ് മോഡലിങ്ങിൽ ഒരു കൈ നോക്കുന്നത്. മോഡലിങ്ങ് രംഗത്തു നിന്ന് ലഭിച്ച ബന്ധങ്ങളാണ് സീരിയലിലേക്ക് എത്താൻ കാരണമായത്. എം ബി എ കഴിഞ്ഞ് കുറച്ചു നാൾ മാജിക് പ്ലാനറ്റിൽ റിലേഷൻഷിപ്പ് മാനേജറായി ജോലി നോക്കി. ആ സമയത്ത് മാജിക്കും പഠിച്ചു. ഷോ ബിസിനസിൽ ആണെങ്കിലും യുവകൃഷ്ണ ക്രീമുകൾ ഉപയോഗിക്കുകയോ പാർലറിൽ പോകുകയോ ചെയ്യില്ല. അലോവെര ജെൽ പോലെ സ്വാഭാവികമായ ചർമസംരക്ഷണ മാർഗങ്ങൾ ഉപയോഗിക്കാറുണ്ട്. നന്നായി വെള്ളം കുടിക്കുമെന്നും യുവകൃഷ്ണ വ്യക്തമാക്കി.