സിനിമാപ്രേമികളുടെ ഇഷ്ടസംവിധായകൻ ക്രിസ്റ്റഫര്‍ നൊലാന്റെ പുതിയ ചിത്രം ടെനെറ്റ് പ്രഖ്യാപിച്ചു. ബോളിവുഡ് നടി ഡിംപിൾ കപാഡിയ ഹോളിവുഡിൽ അരങ്ങേറ്റം കുറിക്കുന്ന ചിത്രം കൂടിയാണിത്. നൊലാന്റെ ആക്‌ഷൻ എപ്പിക് ആയ ചിത്രം ഏഴ് രാജ്യങ്ങളിൽ ചിത്രീകരിക്കുന്നു. ചിത്രത്തിന്റെ പ്രമേയം രാജ്യാന്തര ചാരവൃത്തിയാണ്. തിരക്കഥ വളരെ രഹസ്യമായി സൂക്ഷിക്കുന്ന സംവിധായകനായ നോലാൻ സിനിമയിൽ അഭിനയിക്കാൻ എത്തിയ റോബർട്ട് പാറ്റിൻസന് തിരക്കഥ വായിക്കുവാൻ നൽകിയത് അടച്ചു പൂട്ടിയ മുറിയിൽ വച്ചാണ്. ഡിംപിളിനെ ചിത്രത്തിലേക്ക് തിരഞ്ഞെടുത്തത് ഒഡീഷൻ വഴിയാണെന്ന് അവരുടെ മാനേജറായ പുർവി മാധ്യമങ്ങളോട് പറഞ്ഞു.
സിനിമാ കരിയറിൽ ഇതുവരെ ഒരു ഒഡിഷനിൽ പങ്കെടുക്കാത്ത വ്യക്തിയായിരുന്നു ഡിംപിൾ.ആരോൺ ടെയ്‌ലർ ജോൺസൺ, കെന്നത്ത് ബ്രാണഗ്, മൈക്കല്‍ കെയ്ൻ, ജോൺ ഡേവിഡ് വാഷിങ്ടൺ, റോബര്‍ട്ട് പാറ്റിൻസൺ, എലിസബത്ത്, ഡെബിക്കി, ക്ലെമെൻ പോസി എന്നിവരാണ് ചിത്രത്തിലെ മറ്റ് പ്രധാനതാരങ്ങൾ. അടുത്ത വർഷം ജൂലൈ 17നാണ് ചിത്രത്തിന്റെ റിലീസ്.ഇന്റർസ്റ്റെല്ലാർ, ഡൺകിർക് തുടങ്ങിയ നൊലാൻ ചിത്രങ്ങൾക്കു ക്യാമറ ചലിപ്പിച്ച ഹൊയ്തി വാൻ ഹൊയ്തെമ ഛായാഗ്രഹണം നിർവഹിക്കുന്ന ചിത്രത്തിന്റെ സംഗീതം കൈകാര്യം ചെയ്യുന്നത് ലുഡ്‌വിഗ് ഗൊരാൻസൺ ആണ്.
