ജൂനിയര്‍ ആര്‍ട്ടിസ്റ്റായി വന്ന് സിനിമയില്‍ തന്റേതായ ഇടം കണ്ടെത്തിയ നടനാണ് ജോജു ജോര്‍ജ്. നിര്‍മാതാവ് എന്ന നിലയിലും സിനിയില്‍ സജീവമാണ് താരം. വര്‍ഷങ്ങള്‍ വീണ്ട കഠിനാധ്വാനവും പരിശ്രമവുമുണ്ട് ജോജു ജോര്‍ജിന്റെ വളര്‍ച്ചയ്ക്ക് പിന്നില്‍. തന്റഎ വാഹന പ്രേമം പല അഭിമുഖങ്ങളിലും താരം പങ്കുവച്ചിട്ടുണ്ട്. ഒരു സാന്‍ട്രോ സ്വന്തമാക്കാനായിരുന്നു ജോജു ആഗ്രഹിച്ചത്. എന്നാല്‍ ഇന്ന് ജോജുവിന്റെ ഗ്യാരേജില്‍ ഒമ്‌നി മുതല്‍ പോര്‍ഷെ വരെയുണ്ട്.
ജോജുവിന്റെ വാഹന ശേഖരത്തിന്റെ വിഡിയോ സംവിധായകന്‍ അഖില്‍ മാരാര്‍ സോഷ്യല്‍ മീഡിയയിലൂടെ പങ്കുവച്ചിരുന്നു. ‘സ്വന്തമായി ഒരു സാന്‍ട്രോ കാര്‍, സിനിമയില്‍ ഡയലോഗ് ഉള്ള ഒരു വേഷം, ഇതായിരുന്നു ആഗ്രഹം. അതിന് വേണ്ടി അയാള്‍ 15 വര്‍ഷം അലഞ്ഞു. കാലം ഇന്നയാളെ നായകന്‍ ആക്കി പത്തോളം സിനിമകളുടെ നിര്‍മാതാവ് ആക്കി. ഒന്നുമില്ലായ്മയില്‍ നിന്നും ആഗ്രഹഹിച്ചത് നേടി എടുത്തവന്റെ നിശ്ചയ ദാര്‍ഢ്യത്തിന്റെ ശക്തിയാണ് ജോജു ജോര്‍ജ്. വാഹനങ്ങളെ മക്കളെ പോലെ സ്‌നേഹിക്കുന്ന ഒരു വണ്ടി പ്രാന്തന്റെ വീടിനു മുന്നില്‍ ഇങ്ങനെ ഒരു കാഴ്ച്ച കണ്ടപ്പോള്‍ അതങ്ങു ഞാന്‍ കാമറയില്‍ ആക്കി എന്ന് മാത്രം. സ്വപ്നം കാണുന്നവര്‍ക്ക് പ്രചോദനം ഇത്തരം ജീവിതങ്ങള്‍ ആണല്ലോ’, ഈ കുറിപ്പോടെയാണ് അഖില്‍ വിഡിയോ പങ്കുവച്ചിരിക്കുന്നത്.
പോര്‍ഷെ കയേന്‍, ബിഎംഡബ്ല്യു എം3. ഔഡി ആര്‍.എസ് 7, ലാന്‍ഡ് റോവര്‍, ഡിഫന്‍ഡര്‍, മിസ്തുബിഷി പജേറോ, മിനി കൂപ്പര്‍, ജീപ്പ് റാങ്ക്‌ളര്‍, ഫോര്‍ഡ് ഇക്കോസ്‌പോര്‍ട്ട്, മാരുതി സുസുക്കി ഒമ്‌നി തുടങ്ങിയ കാറുകളാണ് ജോജുവിന്റെ ഗ്യാരേജിലുള്ളത്. ഇത് കൂടാതെ ബിഎംഡബ്ല്യു സി 400 ജിടി സ്‌കൂട്ടറും ട്രയംഫ് സ്ട്രീറ്റ് ട്രിപ്പിള്‍ ആര്‍ സൂപ്പര്‍ ബൈക്കും ജോജുവിനുണ്ട്. അഖില്‍ മാരാര്‍ പങ്കുവച്ച വിഡിയോ സോഷ്യല്‍ മീഡിയയില്‍ വൈറലായിട്ടുണ്ട്.
