കഴിഞ്ഞദിവസം ആയിരുന്നു അനൂപ് മേനോൻ നായകനായി എത്തിയ ത്രില്ലർ ചിത്രം 21 ഗ്രാംസ് തിയറ്ററുകളിൽ റിലീസ് ചെയ്തത്. ആദ്യാവസാനം ആകാംക്ഷയും ഉദ്വോഗവും നിറഞ്ഞ ചിത്രത്തിന് വമ്പൻ സ്വീകരണമാണ് പ്രേക്ഷകർ നൽകിയത്. ക്ലൈമാക്സ് രംഗങ്ങൾ കണ്ട് പ്രേക്ഷകർ തരിച്ചിരുന്നപ്പോൾ ഒരു മികച്ച ത്രില്ലർ ചിത്രത്തിന്റെ വിജയക്കുതിപ്പിനാണ് തിയറ്ററുകൾ സാക്ഷ്യം വഹിച്ചത്. ഒരു കൊലപാതക പരമ്പര അന്വേഷിക്കാൻ എത്തുന്ന ക്രൈം ബ്രാഞ്ച് ഡി വൈ എസ് പി നന്ദകിഷോറിന്റെ അന്വേഷണത്തിന്റെ കഥയാണ് ചിത്രം പറയുന്നത്. സ്വന്തം കുടുംബത്തിലെ ഒരു മരണം നൽകിയ മാനസികാവസ്ഥയിൽ നിന്ന് മുക്തനാവാത്ത സമയത്താണ് ഈ കേസ് നന്ദകിഷോറിനെ തേടി എത്തുന്നത്. എന്നാൽ കേസ് അന്വേഷണം ചെന്നു നിൽക്കുന്നത് നന്ദകിഷോറിന്റെ വ്യക്തിജീവിതവുമായി വലിയ രീതിയിൽ ബന്ധപ്പെട്ടാണ്.
ബിബിൻ കൃഷ്ണ തന്നെയാണ് തിരക്കഥ ഒരുക്കിയിരിക്കുന്നത്. തിരക്കഥയുടെ ശക്തിയൊട്ടും നഷ്ടപ്പെടാതെ തന്നെ ദൃശ്യഭാഷ ഒരുക്കിയ ബിബിൻ കൃഷ്ണയുടെ സംവിധാന മികവ് തന്നെയാണ് ഈ ചിത്രത്തെ ഗംഭീരമാക്കിയത്, ആദ്യാവസാനം പ്രേക്ഷകനെ ആകാംഷയുടെ മുൾമുനയിൽ നിർത്തുന്നു ചിത്രം. വളരെ വിശ്വസനീയമായ രീതിയിൽ ചിത്രം ഒരുക്കാൻ കഴിഞ്ഞു എന്നതും സംവിധായകന്റെ വിജയമാണ്. വ്യത്യസ്തമായ കഥാ പശ്ചാത്തലം കൊണ്ടും കഥാ സന്ദർഭങ്ങൾ കൊണ്ടും മികച്ച സംഭാഷണങ്ങൾ കൊണ്ടും രസം പകരുന്ന ചിത്രമാണ് 21 ഗ്രാംസ്. ഒരു ത്രില്ലർ ചിത്രത്തിന്റെ എല്ലായ്പ്പോഴും അതിന്റെ ക്ലൈമാക്സ് തന്നെയാണ്. ഇവിടെയും ക്ലൈമാക്സ് ചിത്രത്തിനോട് അങ്ങേയറ്റം നീതി പുലർത്തി. സിനിമയിലെ ഓരോ സങ്കീർണതകളും പ്രവചനാതീതമാണ് എന്നതും ചിത്രത്തെ ഗംഭീരമാക്കുന്നു.
റിനീഷ് കെ എൻ ദി ഫ്രണ്ട് റോ പ്രൊഡക്ഷൻസിന്റെ ബാനറിൽ നിർമ്മിച്ചിരിക്കുന്ന ഈ ചിത്രത്തിൽ പ്രധാന വേഷങ്ങളിൽ എത്തിയിരിക്കുന്നത് അനൂപ് മേനോൻ, രഞ്ജിത്, ലെന, രഞ്ജി പണിക്കർ, ലിയോണ ലിഷോയ്, അനു മോഹന്‍, മാനസ രാധാകൃഷ്ണന്‍, നന്ദു, ശങ്കര്‍ എന്നിവരാണ്. ജിത്തു ദാമോദർ ആണ് ഛായാഗ്രഹണം. സംഗീതം – ദീപക് ദേവ്. അപ്പു എൻ ഭട്ടതിരിയാണ് ചിത്രം എഡിറ്റ് ചെയ്തത്.
