അനൂപ് മേനോൻ നായകനായി എത്തുന്ന ഏറ്റവും പുതിയ ചിത്രമായ 21 ഗ്രാംസ് ആണ് ഇപ്പോൾ പ്രേക്ഷകർ കാണാൻ കാത്തിരിക്കുന്ന മലയാള ചിത്രങ്ങളിൽ ഒന്ന്. ആദ്യാവസാനം പ്രേക്ഷകരെ ത്രില്ലടിപ്പിക്കുന്ന ഒരു ഇൻവെസ്റ്റിഗേഷൻ ത്രില്ലർ ആയാണ് ഈ ചിത്രം ഒരുക്കിയിരിക്കുന്നത് എന്ന സൂചനയാണ് ഇതിന്റെ ടീസർ, സൂപ്പർ ഹിറ്റായി മാറിയ ഇതിന്റെ ട്രയ്ലർ എന്നിവ നമ്മുക്ക് തന്നത്. ടീസറിന് ശേഷം പുറത്തു വന്ന ഇതിലെ ആദ്യ ഗാനവും വലിയ പ്രേക്ഷക ശ്രദ്ധയാണ് നേടിയത്.
പ്രശസ്ത സംഗീത സംവിധായകൻ ദീപക് ദേവിന്റെ സംഗീതത്തില്‍, വിനായക് ശശികുമാർ വരികൾ രചിച്ച ആ ഗാനം ആലപിച്ചത് ഹരിശങ്കർ ആണ്. മാർച്ച് പതിനെട്ടിന് ആണ് 21 ഗ്രാംസ് തീയേറ്ററുകളിൽ എത്തുക. ഉദ്വേഗത്തിന്റെ നിമിഷങ്ങൾ സമ്മാനിക്കുന്ന ട്രയ്ലർ തന്നെയാണ് ഈ ചിത്രത്തിന് മേലുള്ള പ്രതീക്ഷകൾ വർധിപ്പിക്കുന്നത്.
ദി ഫ്രണ്ട് റോ പ്രൊഡക്ഷൻസിന്റെ ബാനറില്‍ റിനിഷ് കെ എൻ നിർമ്മിച്ച ഈ ചിത്രം, നവാഗതനായ ബിബിന്‍ കൃഷ്ണ ആണ് എഴുതി, സംവിധാനം ചെയ്തിരിക്കുന്നത്. കൊലയാളിയെ തേടിയുള്ള അന്വേഷണ ഉദ്യോഗസ്ഥരുടെ യാത്ര കാണാൻ പ്രേക്ഷകർ ആവേശത്തോടെയാണ് കാത്തിരിക്കുന്നത്. ക്രൈംബ്രാഞ്ച് ഡി.വൈ.എസ്.പി നന്ദകിഷോര്‍ എന്ന കഥാപാത്രമായി അനൂപ് മേനോന്‍ എത്തുന്ന ഈ ചിത്രത്തിൽ ലെന, സംവിധായകന്‍ രഞ്ജിത്, രണ്‍ജി പണിക്കര്‍, ലിയോണ ലിഷോയ്, ലെന, അനു മോഹന്‍, മാനസ രാധാകൃഷ്ണന്‍, നന്ദു, ശങ്കര്‍ രാമകൃഷ്ണന്‍, പ്രശാന്ത് അലക്സാണ്ടര്‍, ചന്തുനാഥ്, മറീന മൈക്കിള്‍, വിവേക് അനിരുദ്ധ് എന്നിവരും അഭിനയിച്ചിട്ടുണ്ട്. ജിത്തു ദാമോദര്‍ ക്യാമറ ചലിപ്പിച്ച ഈ ചിത്രം അപ്പു എന്‍ ഭട്ടതിരി ആണ് എഡിറ്റ് ചെയ്തിരിക്കുന്നത്.
