ധനുഷിന്റെയും സായി പല്ലവിയുടെയും ചിത്രമായ മാരി 2 വിലെ ‘റൗഡി ബേബി’ എന്ന ഗാനം പുതിയ റെക്കോർഡ് കൈവരിച്ചിരിക്കുകയാണ്. മലയാളത്തിന്റെ മലർ മിസ് സായ് പല്ലവിയുടെ നൃത്തച്ചുവടുകൊണ്ട് ഗാനം ശ്രദ്ധനേടിയിരുന്നു. റിലീസ് ചെയ്ത ആദ്യ ദിനം തന്നെ ഒരു കോടിയിലധികം ആളുകൾ കണ്ട ഈ ഗാനത്തിന് ഇപ്പോൾ അഞ്ചു മാസം ആകുമ്പോൾ 50 കോടിയിലധികം വ്യൂവേഴ്സ് ആണ് ഉള്ളത്.തെന്നിന്ത്യൻ സൂപ്പർ താരം ധനുഷ് ആയിരുന്നു നായകൻ.
ധനുഷ് ഒരു മികച്ച ഡാൻസർ ആണെങ്കിലും ധനുഷിനെ വെല്ലുന്ന പ്രകടനമായിരുന്നു സായി പല്ലവി റൗഡി ബേബിയിൽ കാഴ്ച വച്ചത് എന്നായിരുന്നു ആരാധകരുടെ അഭിപ്രായം. നായകന്മാർ മാത്രം ചെയ്യുന്ന ഫാസ്റ്റ് നമ്പർ സ്റ്റെപ്പുകൾക്കാണ് ധനുഷിനൊപ്പം സായ് പല്ലവി ചുവടുവച്ചത്. ചുവടുകൾക്കൊപ്പം സായിപല്ലവിയുടെ അഭിനയവും ആരാധകരുടെ മനംകവന്നിരുന്നു. ഗാനത്തിന്റെ കൊറിയോഗ്രാഫർ പ്രഭുദേവയാണ്. യുവൻ ശങ്കർരാജ ഈണം നൽകിയ ഈ ഗാനം യൂട്യൂബ് ട്രെൻഡിംങ്ങിൽ ഒന്നാമതെത്തിയിരുന്നു. ഗാനമാലപിച്ചത് ധനുഷും ദീയും ചേര്‍ന്നാണ്.
