ജയറാമിന്റെ തിരിച്ചുവരവ് ഗംഭീരമാക്കി അബ്രഹാം ഓസ് ലെർ തിയറ്ററുകളിൽ പ്രദർശനം തുടരുകയാണ്. കഴിഞ്ഞ കുറേ കാലത്തെ ഇടവേളയ്ക്ക് ശേഷം ഒരു ജയറാം ചിത്രത്തിനു വേണ്ടി ആളുകൾ തിരക്കു കൂട്ടുന്നത് കഴിഞ്ഞദിവസം കണ്ടു. 150 ൽ അധികം കൂടുതൽ ഷോകളാണ് ആദ്യദിവസം മാത്രം ചിത്രത്തിനു വേണ്ടി നടന്നത്. മമ്മൂട്ടിയുടെ സാന്നിധ്യവും ചിത്രത്തെ വേറൊരു തലത്തിലേക്ക് ഉയർത്തി. ബോക്സ് ഓഫീസിലും വലിയ ചലനമാണ് ഓസ് ലെർ സൃഷ്ടിച്ചത്. ഒരു ജയറാം ചിത്രത്തിന്റെ കരിയർ ബെസ്റ്റ് ഓപ്പണിംഗ് ഡേ ആണ് ഓസ് ലെറിന്റേത് എന്നാണ് റിപ്പോർട്ടുകൾ.
ആദ്യദിവസം ചിത്രത്തിന്റെ ബോക്സ് ഓഫീസ് കളക്ഷൻ 2.80 കോടി രൂപയാണ്. ഇത് ആദ്യ കണക്കുകളാണ്. ദിവസത്തെ മുഴുവൻ ഷോകളുടെയും കണക്ക് എത്തുമ്പോൾ ബോക്സ് ഓഫീസിൽ ആദ്യദിവസം മൂന്ന് കോടിയിലധികം രൂപ ചിത്രം സ്വന്തമാക്കുമെന്നാണ് കരുതുന്നത്. അഞ്ചാം പാതിര എന്ന ചിത്രത്തിന് ശേഷം മിഥുൻ മാനുവൽ തോമസ് സംവിധാനം ചെയ്യുന്ന ചിത്രമാണിത്. ഏതായാലും വാരാന്ത്യത്തിൽ മികച്ച പ്രകടനമാണ് ചിത്രത്തെ കാത്തിരിക്കുന്നത്. വ്യക്തിജീവിതത്തില്‍ ചില കടുത്ത അനുഭവങ്ങള്‍ നേരിടേണ്ടിവന്നിട്ടുള്ള വിഷാദരോഗിയായ കഥാപാത്രമാണ് ചിത്രത്തിൽ ജയറാമിന്റേത്. വളരെ കാലത്തിന് ശേഷമാണ് ജയറാമും മമ്മൂട്ടിയും ചിത്രത്തില്‍ ഒന്നിച്ചെത്തുന്നത്.
ദിലീഷ് പോത്തൻ, അ‍ർജുൻ അശോകൻ, അനശ്വര രാജൻ, ജഗദീഷ്, സായ് കുമാർ തുടങ്ങി ഒരു വലിയ താരനിര തന്നെയുണ്ട് ചിത്രത്തിൽ. ഇര്‍ഷാദ് എം ഹസനും മിഥുന്‍ മാനുവല്‍ തോമസും ചേര്‍ന്ന് നിര്‍മ്മിക്കുന്ന ചിത്രത്തിന്റെ ഛായാഗ്രഹണം നന്‍പകല്‍ നേരത്ത് മയക്കമുള്‍പ്പെടെയുള്ള ചിത്രങ്ങളുടെ ക്യാമറ കൈകാര്യം ചെയ്ത തേനി ഈശ്വര്‍ ആണ്. സംഗീതം മിഥുന്‍ മുകുന്ദന്‍, എഡിറ്റിംഗ് ഷമീര്‍ മുഹമ്മദ്, പ്രൊഡക്ഷന്‍ ഡിസൈന്‍ ഗോകുല്‍ ദാസ്.
