നീണ്ടനാളത്തെ ആശുുപത്രി വാസത്തിനും ചികിത്സയ്ക്കും ഒടുവിൽ ജീവിതത്തിലേക്കുള്ള തിരിച്ചു വരവിന്റെ പാതയിലാണ് നടൻ ബാല. ചെറിയ പെരുന്നാൾ ദിനത്തിൽ എല്ലാവർക്കും ഈദ് മുബാറക് നേർന്ന് പങ്കുവെച്ച കുറിപ്പിലാണ് തിരിച്ചു വരവിന്റെ കാര്യം ബാല പങ്കുവെച്ചത്. ഭാര്യ എലിസബത്തിന് ഒപ്പമുള്ള ചിത്രം പങ്കുവെച്ചാണ് ബാല തന്റെ സന്തോഷം ലോകത്തെ അറിയിച്ചത്.
നിറചിരിയോടെ ഒരു ഗ്ലാസിൽ നിന്ന് ജ്യൂസ് കുടിക്കുന്ന വിധത്തിലാണ് ചിത്രത്തിൽ ബാലയും എലിസബത്തും. ഒരു ചെറിയ കുറിപ്പും ചിത്രത്തിനൊപ്പം ബാല പങ്കുവെച്ചു. ‘എല്ലാ പ്രാ‍ർത്ഥനകൾക്കും നന്ദി. നിറയെ സ്നേഹത്തോടെയും വാത്സല്യത്തോടെയും, നിങ്ങളുടെ ഉത്സവം ആഘോഷിക്കൂ. വീഡിയോയുമായി ഉടനെ വരാം. ബാലയും എല്ലുവും’ – എന്നാണ് ബാല സോഷ്യൽ മീഡിയയിൽ കുറിച്ച സന്ദേശം.
ആശംകളുമായി നിരവധി പേരാണ് ഫേസ്ബുക്ക് പോസ്റ്റിന് താഴെ എത്തിയത്. എത്രയും പെട്ടെന്ന് സുഖം പ്രാപിച്ച് ജീവിതത്തിലേക്ക് തിരിച്ചു വരൂവെന്ന് നിരവധി പേർ കുറിച്ചു. കൊച്ചിയിലെ ആശുപത്രിയിൽ ആയിരുന്നു താരം ചികിത്സ തേടിയത്. ബാലയ്ക്ക് സുഖമില്ലാത്ത വാർത്ത വന്നതിനെ തുടർന്ന് അദ്ദേഹത്തിന്റെ സഹോദരൻ ചെന്നൈയിൽ നിന്ന് കൊച്ചിയിൽ എത്തിയിരുന്നു.
