ചിയാന്‍ വിക്രം നായകനായി എത്തിയ ഏറ്റവും പുതിയ ചിത്രമാണ് കോബ്ര. ഇന്നലെയായിരുന്നു ലോകമെമ്പാടുമുള്ള തീയറ്ററുകളില്‍ ചിത്രം പ്രദര്‍ശനത്തിനെത്തിയത്. സമ്മിശ്ര പ്രതികരണമാണ് ചിത്രത്തിന് ലഭിച്ചിരിക്കുന്നത്. കോബ്രയില്‍ വിവിധ ഗെറ്റപ്പുകളിലാണ് വിക്രം എത്തുന്നത്. അതുതന്നെയാണ് ചിത്രത്തിന്റെ ഹൈലൈറ്റ്. ഇപ്പോഴിതാ ചിത്രത്തിന്റെ മേക്കിംഗ് വിഡിയോ പുറത്തുവിട്ടിരിക്കുകയാണ് അണിയറപ്രവര്‍ത്തകര്‍. വിവിധ ഗെറ്റപ്പുകളില്‍ വിക്രമിനെ അണിയിച്ചൊരുക്കുന്നത് വിഡിയോയില്‍ കാണാം.
കോബ്രയില്‍ എട്ടോളം വേഷങ്ങള്‍ താന്‍ കൈകാര്യം ചെയ്യുന്നുണ്ടെന്നാണ് വിക്രം പറയുന്നത്. ബോംബെയില്‍ നിന്നുള്ള ടീമാണ് വിക്രമിനെ അണിയിച്ചൊരുക്കിയത്. ഓരോ കഥാപാത്രങ്ങള്‍ക്കും വേണ്ടിയുള്ള സജ്ജീകരണങ്ങള്‍ ഒരുക്കുന്നതിന് ദിവസങ്ങളും ആഴ്ചകളും വേണ്ടിവന്നുവെന്നാണ് അണിയറപ്രവര്‍ത്തകര്‍ പറയുന്നത്. ഏറെ ക്ഷമയോടെയാണ് വിക്രം ഇതിനായി സഹകരിച്ചതെന്നും അണിയറപ്രവര്‍ത്തകര്‍ പറയുന്നു.
സെവന്‍ സ്‌ക്രീന്‍ സ്റ്റുഡിയോയുടെ ബാനറില്‍ എസ്.എസ്. ലളിത് കുമാര്‍ നിര്‍മ്മിച്ച് ആര്‍. അജയ് ജ്ഞാനമുത്തുവാണ് ചിത്രം സംവിധാനം ചെയ്തിരിക്കുന്നത്. ഇമൈക്ക നൊടികള്‍, ഡിമാന്‍ഡി കോളനി എന്നീ സൂപ്പര്‍ഹിറ്റ് സിനിമകള്‍ക്ക് ശേഷം അജയ് ജ്ഞാനമുത്തു സംവിധാനം ചെയ്യുന്ന ചിത്രമാണ് കോബ്ര. മൂന്ന് വര്‍ഷത്തിലേറയായി നിരവധി ഷെഡ്യൂളുകളിലായാണ് ചിത്രീകരണം പൂര്‍ത്തിയായത്. ശ്രീ ഗോകുലം മൂവീസ്, ത്രൂ ഡ്രീം ബിഗ് ഫിലിംസ്, ഇ ഫോര്‍ എന്റര്‍ടെയ്ന്‍മെന്റ് എന്നിവര്‍ ചേര്‍ന്നാണ് ചിത്രം തീയറ്ററുകളില്‍ എത്തിക്കുന്നത്. വി എഫ് എക്സ് വര്‍ക്കുകള്‍ക്ക് മാത്രം 28 കോടി രൂപയാണ് നിര്‍മ്മാതാക്കള്‍ ചിലവഴിച്ചത്. ശ്രീനിഥി ഷെട്ടി, മിയ, റോഷന്‍ മാത്യു, ഇര്‍ഫാന്‍ പത്താന്‍, സര്‍ജാനോ ഖാലിദ്, മിയ ജോര്‍ജ്, കനിഹ, പദ്മപ്രിയ, മാമുക്കോയ, എന്നിവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്.
