തെന്നിന്ത്യന്‍ താരം നയന്‍താരയും സംവിധായകന്‍ വിഘ്‌നേഷ് ശിവനും തമ്മിലുള്ള വിവാഹത്തില്‍ പങ്കെടുക്കാന്‍ നടന്‍ ദിലീപെത്തി. ചെന്നൈയ്ക്ക് സമീപമുള്ള മഹാബലിപുരത്തെ ഒരു റിസോര്‍ട്ടിലാണ് വിവാഹ ചടങ്ങുകള്‍ നടക്കുന്നത്. വിവാഹത്തില്‍ പങ്കെടുക്കാനെത്തിയ ദിലീപ് ഉള്‍പ്പെടെയുള്ളവരുടെ വിഡിയോ വൈറലായി.
മലയാള സിനിമയില്‍ നയന്‍താരയുടെ ചുരുക്കം സുഹൃത്തുക്കളില്‍ ഒരാളാണ് ദിലീപ്. സിദ്ദിഖ് സംവിധാനം ചെയ്ത ബോഡിഗാര്‍ഡില്‍ ഇരുവരും ഒന്നിച്ച് അഭിനയിച്ചിരുന്നു. ജീത്തു ജോസഫ് സംവിധാനം ചെയ്ത ലൈഫ് ഓഫ് ജോസൂട്ടിയിലും ദിലീപിനൊപ്പം നയന്‍താര അഭിനയിച്ചു. വര്‍ഷങ്ങളായി ഇരുവരും സൗഹൃദം സൂക്ഷിക്കുന്നുണ്ട്.
നയന്‍സ്-വിഘ്‌നേഷ് വിവാഹത്തില്‍ പങ്കെടുക്കാന്‍ നിരവധി പേരാണ് എത്തുന്നത്. ബോളിവുഡ് താരം ഷാരൂഖ് ഖാന്‍, സംവിധായകന്‍ ഗൗതം വാസുദേവ മേനോന്‍, നടന്മാരായ വിജയ് സേതുപതി, സൂര്യ, കാര്‍ത്തി, കമല്‍ഹാസന്‍ ഉള്‍പ്പെടെയുള്ളവര്‍ വിവാഹത്തിന് എത്തിയിട്ടുണ്ട്. വൈകിട്ട് സുഹൃത്തുക്കള്‍ക്കായി പ്രത്യേക റിസപ്ഷന്‍ ഒരുക്കിയിട്ടുണ്ട്.
