‘കണ്ണൂർ സ്ക്വാഡ് എനിക്ക് ഇഷ്ടപ്പെട്ടു, നിങ്ങൾക്കും ഇഷ്ടപ്പെട്ടെന്ന് തോന്നുന്നു’ – വാപ്പച്ചിയുടെ സിനിമയെ വാനോളം പുകഴ്ത്തി ദുൽഖർ സൽമാൻ

മമ്മൂട്ടി നായകനായി എത്തിയ ചിത്രം കണ്ണൂർ സ്ക്വാഡിനെ വാനോളം പുകഴ്ത്തി ദുൽഖർ സൽമാൻ. സോഷ്യൽ മീഡിയയിൽ പങ്കുവെച്ച കുറിപ്പിലാണ് കണ്ണൂർ സ്ക്വാഡ് ടീമിന് ദുൽഖർ കൈയടിച്ചത്. നവാഗത സംവിധായകൻ റോബി വർഗീസ് രാജ് സംവിധാനം ചെയ്ത ചിത്രമാണ് കണ്ണൂർ സ്ക്വാഡ്. ഒരു പുതുമുഖ സംവിധായകന് കൂടി അവസരം കൊടുത്തതിൽ മമ്മൂട്ടിക്ക് അഭിമാനിക്കാം. കാരണം, ചിത്രം ആദ്യദിവസം തന്നെ മികച്ച അഭിപ്രായം സ്വന്തമാക്കി കൂടുതൽ സ്ക്രീനുകളിൽ പ്രദർശനം തുടരുകയാണ്.

വാപ്പച്ചിയുടെ സിനിമയെ വാനോളം പുകഴ്ത്തി ദുൽഖർ സൽമാനും രംഗത്തെത്തി. ‘സിനിമ എനിക്ക് ഇഷ്ടപ്പെട്ടു. കേൾക്കുന്നതും വായിക്കുന്നതും എല്ലാം കേട്ടിട്ട് നിങ്ങൾക്കും സിനിമ ഇഷ്ടപ്പെട്ടെന്ന് തോന്നുന്നു.’ – കണ്ണൂർ സ്ക്വാഡ് ടീമിനെ അഭിനന്ദിച്ചാണ് കുറിപ്പ് അവസാനിക്കുന്നത്. രസകരമായ കമന്റുകളാണ് ദുൽഖറിന്റെ പോസ്റ്റിന് വന്നിരിക്കുന്നത്. മിക്കവരും അച്ഛനെ കണ്ട് പഠിക്കണമെന്ന ഉപദേശമാണ് ദുൽഖറിന് നൽകുന്നത്.

കുറ്റാന്വേഷണചിത്രമായാണ് കണ്ണൂർ സ്ക്വാഡ് എത്തുന്നത്. നൻപകൽ നേരത്ത് മയക്കം, റോഷാക്ക്, കാതൽ എന്നീ ചിത്രങ്ങൾക്ക് ശേഷം മമ്മൂട്ടി കമ്പനി നിർമിക്കുന്ന ചിത്രമാണ് കണ്ണൂർ സ്ക്വാഡ്. സംവിധായകൻ റോബി രാജിന്റെ ആദ്യചിത്രം കൂടിയാണ് ഇത്. ഗ്രേറ്റ് ഫാദർ, പുതിയ നിയമം എന്നീ ചിത്രങ്ങളുടെ ഛായാഗ്രാഹകൻ ആയിരുന്നു റോബി രാജ്. കിഷോർ കുമാർ, വിജയരാഘവൻ, അസീസ് നെടുമങ്ങാട്, ശബരീഷ്, റോണി ഡേവി‍ഡ്, മനോജ് കെ യു തുടങ്ങിയ താരങ്ങൾ പ്രധാന വേഷത്തിൽ എത്തുന്ന സിനിമ ഒരു ഇൻവെസ്റ്റിഗേഷൻ ത്രില്ലർ ആണ്. എസ് ജോർജാണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസർ. മുഹമ്മദ് ഷാഫിയുടേതാണ് ചിത്രത്തിന്റെ കഥ. നടൻ റോണി ഡേവിഡ് രാജും മുഹമ്മദ് ഷാഫിയും ചേർന്നാണ് തിരക്കഥ രചിച്ചിരിക്കുന്നത്. മുഹമ്മദ് റാഹിൽ ആണ് ഛായാഗ്രഹണം. ചിത്രത്തിന്റെ സംഗീതം സുഷിൻ ശ്യാമും എഡിറ്റർ പ്രവീൺ പ്രഭാകറുമാണ്. ദുൽഖർ സൽമാന്റെ ഉടമസ്ഥതയിലുള്ള വേഫേയർ ഫിലിംസ് ആണ് ചിത്രം കേരളത്തിൽ വിതരണം നിർവഹിക്കുന്നത്. പാലാ, കൊച്ചി, കണ്ണൂർ, വയനാട്,അതിരംപള്ളി, പൂനെ, മുംബൈ എന്നീ സ്ഥലങ്ങളായിരുന്നു പ്രധാന ലൊക്കേഷനുകൾ.