വിനീത് ശ്രീനിവാസന്‍ നായകനായി എത്തിയ മുകുന്ദന്‍ ഉണ്ണി അസോസിയേറ്റ്‌സ് എന്ന ചിത്രത്തെ രൂക്ഷഭാഷയില്‍ വിമര്‍ശിച്ച് നടനും താരസംഘടന ഭാരവാഹിയുമായ ഇടവേള ബാബു. സിനിമ മുഴുവനും നെഗറ്റീവാണെന്നും ഇതിന് എങ്ങനെ സെന്‍സര്‍ഷിപ്പ് സര്‍ട്ടിഫിക്കറ്റ് ലഭിച്ചെന്നും ഇടവേള ബാബു ചോദിച്ചു. നിയമസഭ രാജ്യാന്തര പുസ്തകോത്സവത്തോടനുബന്ധിച്ച് സിനിമയും എഴുത്തും എന്ന വിഷയത്തില്‍ സംഘടിപ്പിച്ച ചര്‍ച്ചയിലാണ് ഇടവേള ബാബു സിനിമയ്‌ക്കെതിരെ ആഞ്ഞടിച്ചത്.
മുകുന്ദന്‍ ഉണ്ണി എന്നൊരു സിനിമ ഇവിടെ ഇറങ്ങി. അതിന് എങ്ങനെ സെന്‍സറിംഗ് കിട്ടിയെന്ന് അറിയില്ല. അതില്‍ മുഴുവന്‍ നെഗറ്റീവാണ്. പടം തുടങ്ങുന്നതു തന്നെ തങ്ങള്‍ക്കാരോടും നന്ദി പറയാനില്ല എന്നു പറഞ്ഞുകൊണ്ടാണ്. ചിത്രത്തിലെ നായിക പറയുന്ന ഭാഷ ഇവിടെ ഉപയോഗിക്കാന്‍ പറ്റില്ല. അങ്ങനെയുള്ള ഭാഷയാണ് അവര്‍ ഉപയോഗിച്ചിരിക്കുന്നത്. സിനിമ കണ്ടതിന് ശേഷം വിനീതിനോട് താന്‍ സംസാരിച്ചിരുന്നു. താങ്കള്‍ എങ്ങനെ ഈ സിനിമയില്‍ അഭിനയിച്ചു എന്ന് താന്‍ ചോദിച്ചു. ഏഴോളം നായകന്മാരോട് കഥ പറഞ്ഞെങ്കിലും ആരും അഭിനയിക്കാന്‍ തയ്യാറായില്ല. എന്നാല്‍ വിനീതിന് ഇതില്‍ നിന്ന് പിന്മാറാന്‍ കഴിയില്ലായിരുന്നു. കാരണം വിനീതിന്റെ അസിസ്റ്റന്റാണ് ഈ പടം സംവിധാനം ചെയ്തതെന്നും ഇടവേള ബാബു പറഞ്ഞു.
അഭിനവ് സുന്ദര്‍ നായക് ആണ് മുകുന്ദന്‍ ഉണ്ണി അസോസിയേറ്റ്‌സ് സംവിധാനം ചെയ്തിരിക്കുന്നത്. നവംബര്‍ പതിനൊന്നിനായിരുന്നു ചിത്രം പ്രേക്ഷകരിലേക്കെത്തിയത്. ജോയ് മൂവി പ്രൊഡക്ഷന്‍സിന്റെ ബാനറില്‍ ഡോക്ടര്‍ അജിത് ജോയ് ആണ് ചിത്രം നിര്‍മ്മിച്ചിരിക്കുന്നത്. വിമല്‍ ഗോപാലകൃഷ്ണനും സംവിധായകനും ചേര്‍ന്നാണ് ചിത്രത്തിന്റെ രചന നിര്‍വഹിച്ചത്. വിനീത് ശ്രീനിവാസനൊപ്പം സുരാജ് വെഞ്ഞാറമൂട്, സുധി കോപ്പ, തന്‍വി റാം, ജഗദീഷ്, മണികണ്ഠന്‍ പട്ടാമ്പി, ബിജു സോപാനം, ജോര്‍ജ് കോര, ആര്‍ഷ ചാന്ദിനി ബൈജു, നോബിള്‍ ബാബു തോമസ്, അല്‍ത്താഫ് സലിം, റിയ സൈറ, രഞ്ജിത്ത് ബാലകൃഷ്ണന്‍, സുധീഷ്, വിജയന്‍ കാരന്തൂര്‍ എന്നിവരാണ് പ്രധാനകഥാപാത്രങ്ങളെ അവതരിപ്പിച്ചത്.
