പൃഥ്വിരാജിന് പിന്നാലെ ലംബോര്‍ഗിനി ഉറൂസ് സ്വന്തമാക്കി ഫഹദ് ഫാസില്‍. 3.15 കോടി രൂപ മുതല്‍ വിലയില്‍ ആരംഭിക്കുന്ന ഈ ആഡംബര വാഹനം ആലപ്പുഴ ആര്‍ ടി ഓഫീസിലാണ് രജിസ്റ്റര്‍ ചെയ്തിരിക്കുന്നത്. ജൂലൈയിലാണ് വാഹനം രജിസ്റ്റര്‍ ചെയ്തതെന്നാണ് വിവരം.
ഇക്കഴിഞ്ഞ ജൂണിലാണ് പൃഥ്വിരാജ് ലംബോര്‍ഗിനി ഉറൂസിന്റെ സെക്കന്‍ഡ് ഹാന്‍ഡ് സ്വന്തമാക്കിയത്. കേരള രജിസ്‌ട്രേഷനിലുള്ള 2019 മോഡല്‍ ഉറുസിന്റെ അന്നത്തെ ഓണ്‍റോഡ് വില ഏകദേശം 4.35 കോടിയാണ്. 5000 കിലോമീറ്ററില്‍ താഴെ ഓടിയ ഉറുസ് ആണ് താരം വാങ്ങിയത്. 3.6 സെക്കന്റില്‍ 100 കിലോമീറ്റര്‍ വേഗവും 12.8 സെക്കന്‍ഡില്‍ 200 കിലോമീറ്റര്‍ വേഗതയും കൈവരിക്കാന്‍ ശേഷിയുള്ള ഉറുസിന് ‘സൂപ്പര്‍ എസ് യു വി’ എന്ന വിശേഷണമുണ്ട്. 305 കിലോമീറ്ററാണ് പരമാവധി വേഗം.
ഈ വര്‍ഷം ആദ്യം ടൊയോട്ടയുടെ ആഡംബര എം പി വി മോഡലായ വെല്‍ഫയര്‍ ഫഹദ് സ്വന്തമാക്കിയിരുന്നു. ഇതുകൂടാതെ, ജര്‍മന്‍ സൂപ്പര്‍ കാര്‍ നിര്‍മ്മാതാക്കളായ പോര്‍ഷെയുടെ സ്റ്റൈലിഷ് വാഹനമായ 911 കരേര എസ് എന്ന മോഡലും ഫഹദിന്റെ കളക്ഷനില്‍ ഉണ്ട്.
