മഞ്ജു വാര്യര്‍ക്കൊപ്പം അഭിനയിക്കാന്‍ കഴിഞ്ഞത് സ്വപ്‌ന തുല്യമായ കാര്യമെന്ന് നടന്‍ ജയസൂര്യ. മഞ്ജുവിനെ ഒരുപാട് ആരാധിക്കുന്ന വ്യക്തിയാണ് താന്‍. സീനിയോറിറ്റി ഒട്ടും കാണിക്കാതെ വളരെ അടുത്ത സുഹൃത്തിനെ പോലെ ഇടപെടുന്ന വ്യക്തിയാണ് മഞ്ജു എന്നും ജയസൂര്യ പറഞ്ഞു. ജി പ്രജേഷ് സെന്‍ സംവിധാനം ചെയ്യുന്ന ‘മേരി ആവാസ് സുനോ’ എന്ന സിനിമയുടെ ഓഡിയോ ലോഞ്ച് ചടങ്ങില്‍ സംസാരിക്കുകയായിരുന്നു താരം.
‘പത്രം’ എന്ന ചിത്രത്തില്‍ മഞ്ജു വാര്യര്‍ നായികയായിരുന്ന സമയത്ത് അതേ സിനിയമയിലെ ജൂനിയര്‍ ആര്‍ട്ടിസ്റ്റായിരുന്നു താനെന്നും ജയസൂര്യ പറഞ്ഞു. ഇന്ന് പത്രത്തിലെ, താന്‍ ആരാധിച്ച നായികയ്ക്കൊപ്പം ഒരേ സ്‌ക്രീന്‍ പങ്കിടാന്‍ സാധിച്ചത് ഭാഗ്യമാണെന്നും ജയസൂര്യ കൂട്ടിച്ചേര്‍ത്തു. സിനിമയെ സ്‌നേഹിക്കാനായി ചില വ്യക്തിത്വങ്ങള്‍ നമ്മള്‍ പോലും അറിയാതെ നമ്മെ സ്വാധീനിക്കാറുണ്ട്. മമ്മൂക്കയും മോഹന്‍ലാലും ഒക്കെ അങ്ങനെയാണ്. അത്തരത്തില്‍ സിനിമയെ സ്‌നേഹിക്കാന്‍ പഠിപ്പിച്ച വ്യക്തിത്വങ്ങളില്‍ ഒരാളാണ് മഞ്ജു വാര്യര്‍. അതുകൊണ്ട് തന്നെ അവരുമായി തനിക്ക് അഭിനയിക്കാന്‍ കഴിയുക എന്ന് പറയുന്നത് ഭാഗ്യമാണ്. എന്നിലും ഒരുപാട് മുതിര്‍ന്ന ഒരു ആര്‍ട്ടിസ്റ്റാണ് മഞ്ജു. പക്ഷെ നമ്മുടെ വളരെ അടുത്ത സുഹൃത്ത് സംസാരിക്കുന്നത് പോലെയാണ് അവര്‍ ഇടപെടുന്നത്. മഞ്ജുവിനെ ചിരിച്ച മുഖത്തോടുകൂടിയല്ലാതെ താന്‍ കണ്ടിട്ടില്ലെന്നും ജയസൂര്യ പറഞ്ഞു.
മെയ് 13നാണ് ‘മേരി ആവാസ് സുനോ’ തിയേറ്ററുകളില്‍ എത്തുക. ‘ക്യാപ്റ്റന്‍’, ‘വെള്ളം’ എന്നീ സൂപ്പര്‍ഹിറ്റുകള്‍ക്ക് ശേഷം പ്രജേഷ് സെന്നും ജയസൂര്യയും ഒന്നിക്കുന്ന മൂന്നാമത്തെ ചിത്രമാണ് ‘മേരി ആവാസ് സുനോ’. ചിത്രത്തില്‍ റേഡിയോ ജോക്കിയുടെ വേഷത്തിലാണ് ജയസൂര്യ എത്തുന്നത്. ഡോക്ടറാണ് മഞ്ജുവാര്യരുടെ കഥാപാത്രം. ശിവദ, ജോണി ആന്റണി, ഗൗതമി നായര്‍, സോഹന്‍ സീനുലാല്‍, സുധീര്‍ കരമന,ജി.സുരേഷ് കുമാര്‍, ദേവി അജിത്, മിഥുന്‍ വേണുഗോപാല്‍ എന്നിവരും അഭിനയിച്ചിരിക്കുന്നു.
