അനിയത്ത്പ്രാവ് റിലീസ് ചെയ്തിട്ട് കാല്‍ നൂറ്റാണ്ട് തികഞ്ഞിരിക്കുകയാണ്. കുഞ്ചാക്കോ ബോബനും ശാലിനിയും വന്ന് പ്രേക്ഷകരുടെ മനസ് കീഴടക്കി പോയിട്ട് 25 വര്‍ഷം. ഇപ്പോഴിതാ സിനിമയില്‍ നായകന്‍ കുഞ്ചാക്കോ ബോബന്‍ കറങ്ങി നടന്ന ചുവന്ന സ്‌പ്ലെന്‍ഡര്‍ ബൈക്ക് വീണ്ടും വാര്‍ത്തകളില്‍ ഇടം നേടിയിരിക്കുകയാണ്. ആ ബൈക്ക് സ്വന്തമാക്കുകയെന്ന ചാക്കോച്ചന്റെ ഏറെ നാളത്തെ ആഗ്രഹം സഫലമായി. ആ ബൈക്ക് ഇത്രയും നാള്‍ കാത്ത് സൂക്ഷിച്ച ബോണിക്ക് പകരമായി ഒരു പുതിയ സ്‌പ്ലെന്‍ഡര്‍ വാങ്ങാനുള്ള പണം
നല്‍കുകയും ചെയ്തു.
ആലപ്പുഴയിലെ സ്വകാര്യ വാഹന ഷോറൂമിലെ ജീവനക്കാരനാണ് ബോണി. ജോലി ചെയ്യുന്ന ഷോപ്പിലെ എംഡിയുടെ പേരിലായിരുന്നു ബൈക്ക്. തുടര്‍ന്ന് എം.ഡിയില്‍ നിന്ന് ബോണി ബൈക്ക് സ്വന്തമാക്കി. പിന്നീട് അപ്രതീക്ഷിതമായി ബോണിയെ തേടി ചാക്കോച്ചന്റെ കോള്‍ എത്തി. ആരെങ്കിലും പറ്റിക്കാന്‍ വിളിക്കുകയാണെന്നാണ് ആദ്യം ബോണി കരുതിയത്. പിന്നെയാണ് വിളിച്ചത് ചാക്കോച്ചന്‍ തന്നെയാണെന്ന് മനസിലായത്. ബൈക്ക് കൊടുക്കുന്നുണ്ടോ എന്നായിരുന്നു ചാക്കോച്ചന്റെ ചോദ്യം. എത്രയും പെട്ടെന്ന് വേണമെന്നും പറഞ്ഞു. രണ്ട് ദിവസത്തെ സമയം ബോണി ചോദിച്ചു.
ഏറെ ആലോചിച്ച ശേഷം ബൈക്ക് നല്‍കാന്‍ തീരുമാനിച്ചു. ചാക്കോച്ചന്‍ ആളെ പറഞ്ഞയക്കുകയും ഡിമാന്‍ഡ് എന്താണെന്ന് ചോദിക്കുകയും ചെയ്തു. പകരം ഒരു ബൈക്കാണ് ബോണി ചോദിച്ചത്. ജോലി സ്ഥലത്ത് പോകാനും മറ്റും ബോണി ഉപയോഗിച്ചിരുന്നത് ഈ ബൈക്കായിരുന്നു. അങ്ങനെ ബോണിയുടെ ആഗ്രഹം ചാക്കോച്ചന്‍ നിറവേറ്റി. വാഹനം വാങ്ങാനുള്ള പണം അയച്ചു നല്‍കി. അങ്ങനെ സ്‌പ്ലെന്‍ഡറിന്റെ പുതിയ മോഡല്‍ തന്നെ ബോണി സ്വന്തമാക്കി.
