ആസിഫ് അലിക്ക് മമ്മൂട്ടിയുടെ സ്‌നേഹ സമ്മാനം. റോഷാക്കിന്റെ വിജയാഘോഷ പരിപാടിക്കിടെയാണ് താരം ആസിഫ് അലിക്ക് റോളക്‌സ് വാച്ച് സമ്മാനമായി നല്‍കിയത്. തമിഴ് സിനിമ വിക്രം വന്‍ വിജയമായപ്പോള്‍ കമല്‍ഹാസന്‍ സൂര്യയ്ക്ക് റോളക്‌സ് വാച്ച് വാങ്ങിച്ചുകൊടുത്തിരുന്നല്ലോ എന്ന് പറഞ്ഞാണ് മമ്മൂട്ടി സമ്മാനം പ്രഖ്യാപിച്ചത്.
കമല്‍ഹാസന്‍ സൂര്യയ്ക്ക് റോളക്‌സ് വാച്ച് നല്‍കിയ വാര്‍ത്ത കണ്ടിരുന്നു. ആ പടത്തിന് അഞ്ഞൂറ് കോടിയാണ് കളക്ഷന്‍ കിട്ടിയത്. അതില്‍ നിന്ന് പത്തോ പതിനഞ്ചോ ലക്ഷം കൊടുത്ത് ഒരു വാച്ച് മേടിച്ചു കൊടുത്തു, ആസിഫ് തന്നോട് ചോദിച്ചത് ഒരു റോളക്‌സ് വാച്ച് വാങ്ങിച്ചു തരുമോ എന്നാണ. മമ്മൂട്ടി ഈ ഡയലോഗ് പറഞ്ഞ ശേഷം വേദിയിലേക്ക് റോളക്‌സ് വാച്ച് എത്തിക്കുകയായിരുന്നു. ആസിഫിന് തികച്ചും അപ്രതീക്ഷിതമായിരുന്നു ഈ സമ്മാനം.
നേരത്തേ റോഷാക്കിലെ ആസിഫലിയുടെ പ്രകടനത്തെ പ്രശംസിച്ച് മമ്മൂട്ടി രംഗത്തെത്തിയിരുന്നു. നെഗറ്റീവ് ഷെയ്ഡുള്ള ആസിഫ് അലി കഥാപാത്രം മുഖം മറച്ചാണ് പ്രത്യക്ഷപ്പെട്ടത്. ഒരു നടനെ സംബന്ധിച്ചിടത്തോളം ശരീരത്തിനപ്പുറത്ത് മുഖമാണ് പ്രധാനം. ആ മുഖം മറച്ച് അഭിനയിച്ച ആളെ മുഖംകൊണ്ട് അഭിനയിച്ചവരേക്കാള്‍ റെസ്പക്ട് നല്‍കണം എന്നായിരുന്നു ആസിഫിനെ പ്രശംസിച്ച് മമ്മൂട്ടി പറഞ്ഞത്.
