ബാലതാരമായി സിനിമയില്‍ അരങ്ങേറിയെങ്കിലും പിന്നീട് അഭിനയ രംഗത്തുനിന്ന് വിട്ടുനിന്ന് തിരിച്ചുവരവ് നടത്തിയ നടനാണ് പ്രണവ് മോഹന്‍ലാല്‍. ജീത്തു ജോസഫ് സംവിധാനം ചെയ്ത ആദി എന്ന ചിത്രത്തിലൂടെയാണ് പ്രണവ് തിരിച്ചുവരവ് നടത്തിയത്. ചിത്രം മികച്ച വിജയമായിരുന്നു. അതിന് ശേഷം ഇരുപത്തിയൊന്നാം നൂറ്റാണ്ട് എന്ന ചിത്രത്തിലും പ്രണവ് നായക വേഷം ചെയ്തു. തുടര്‍ന്ന് പ്രണവിനെ കാണുന്നത് പ്രിയദര്‍ശന്‍ സംവിധാനം ചെയ്ത മോഹന്‍ലാല്‍ ചിത്രം മരയ്ക്കാറിലാണ്. ചിത്രത്തില്‍ മോഹന്‍ലാലിന്റെ ചെറുപ്പകാലമാണ് പ്രണവ് അവതരിപ്പിച്ചത്.
ഒടുവില്‍ പുറത്തിറങ്ങിയ വിനീത് ശ്രീനിവാസന്‍ ചിത്രം ഹൃദയത്തില്‍ പ്രണവിന്റെ അഭിനയം പ്രേക്ഷക പ്രശംസ പിടിച്ചുപറ്റി. ചിത്രം അമ്പതുകോടി ക്ലബ്ബില്‍ ഇടംപിടിയ്ക്കുകയും ചെയ്തു. ഹൃദയത്തിന്റെ വിജയത്തോടെ പ്രണവിന്റെ താരമൂല്യം ഉയര്‍ന്നു. ഇങ്ങനെയാക്കെയാണെങ്കിലും മാധ്യമങ്ങള്‍ക്ക് മുന്നില്‍ പ്രണവിനെ കാണാന്‍ കിട്ടാറില്ല. സിനിമയുടെ പ്രൊമോഷന്റെ ഭാഗമായോ അല്ലാതെയോ പ്രണവ് മാധ്യമങ്ങള്‍ക്ക് മുന്നില്‍ എത്താറില്ല. അതിനുള്ള കാരണം പറയുകയാണ് നടന്‍ മോഹന്‍ലാല്‍.
ഒരു മാധ്യമത്തിന് നല്‍കിയ അഭിമുഖത്തിലാണ് മോഹന്‍ലാല്‍ ഇക്കാര്യം വിശദീകരിക്കുന്നത്.
പ്രണവ് വളരെ ഷൈ ആയ ആളാണെന്നാണ് മോഹന്‍ലാല്‍ പറയുന്നത്. സിനിമയിലെ ആദ്യ നാളുകളില്‍ തനിക്കും ഇത്തരത്തിലുള്ള സ്വഭാവമായിരുന്നു. അക്കാലത്ത് താന്‍ വളരെ ഷൈ ആയ ആളായിരുന്നു. സാധാരണ ജീവിതം നയിക്കാന്‍ പ്രണവിന് പറ്റുന്നുണ്ട്. എന്നാല്‍ പണ്ട് താന്‍ ഷൈ ആയിരുന്നതിലും കൂടുതലാണ് പ്രണവിന്റെ സ്വഭാവത്തിലുള്ളത്. എന്തിനാണ് താന്‍ വരുന്നതെന്ന് അയാള്‍ ചോദിക്കും. അത് വലിയൊരു ചോദ്യമാണെന്നും മോഹന്‍ലാല്‍ പറയുന്നു.
