കഴിഞ്ഞ നാല്പതു വർഷത്തോളമായി മലയാളസിനിമയിൽ നിറഞ്ഞു നിൽക്കുന്ന നടനാണ് മോഹൻലാൽ. പല തലമുറകളിലെ പ്രതിഭകൾക്കൊപ്പം അഭിനയിച്ചിട്ടുള്ള അദ്ദേഹം ഇന്ത്യൻ സിനിമയിലെ തന്നെ ഏറ്റവും മികച്ച നടൻമാരിൽ ഒരാളാണ്. തന്റെ സിനിമാജീവിതത്തിൽ ഉയർച്ചകൾക്കൊപ്പം ചില പരാജയങ്ങളും സംഭവിച്ചിട്ടുള്ള വ്യക്തി കൂടിയാണ് അദ്ദേഹം. അതുകൊണ്ടു തന്നെയാണ് സിനിമയിലെ ഉയർച്ച – താഴ്ചകളെക്കുറിച്ച് മോഹൻലാൽ ഒരിക്കൽ പറഞ്ഞ വാക്കുകൾ ഇപ്പോൾ സോഷ്യൽ മീഡിയയിൽ വൈറലാകുന്നത്.
സിനിമാരംഗത്തെ ഉയർച്ച – താഴ്ചകളെക്കുറിച്ച് മോഹൻലാൽ പറഞ്ഞ വാക്കുകൾ സോഷ്യൽ മീഡിയ ഏറ്റെടുത്തിരിക്കുകയാണ്. സിനിമാരംഗത്തെ നിരവധി പ്രമുഖരും ഈ കുറിപ്പ് പങ്കു വെച്ചിട്ടുണ്ട്. ഒരു പേപ്പർ കട്ടിങ്ങിലാണ് മോഹൻലാൽ പറഞ്ഞ വാക്കുകൾ. ഇടയ്ക്കൊക്കെ നമ്മുടെ സിനിമകൾ മോശമാവണമെന്നും ആൾക്കാർ കൂവുകയും കുറ്റം പറുകയും ചെയ്യണമെന്നുമാണ് മോഹൻലാലിന്റെ കുറിപ്പിൽ ഉള്ളത്. ഒരു ആക്ടർക്ക്, ഒരു പെർഫോർമർ എന്ന നിലയ്ക്ക് സ്വയം പരിശോധിക്കാൻ അപ്പോൾ മാത്രമേ കഴിയുകയുള്ളൂ എന്നും മോഹൻലാൽ പറയുന്നു.
‘ഒരേ കാര്യം ചെയ്തു കൊണ്ടിരിക്കുന്നതിനിടയ്ക്ക് ചില അപ്സ് ആന്റ് ഡൗൺസൊക്കെ ഉണ്ടാവണ്ടേ ? അപ്പോഴല്ലേ ലൈഫിന് ഒരു രസം. അല്ലാതെ എല്ലാം നല്ലതായി വന്നാൽ എന്താണൊരു രസം. മടുത്ത് പോവില്ലേ ? ഇടയ്ക്കൊക്കെ നമ്മുടെ സിനിമകൾ മോശമാവണം, ആൾക്കാർ കൂവണം, കുറ്റം പറയണം.. ഒക്കെ വേണം. അപ്പോഴല്ലേ ഒരു ആക്ടർക്ക്, ഒരു പെർഫോർമർ എന്ന നിലയ്ക്ക് സ്വയം പരിശോധിക്കാനാവുകയുള്ളൂ’ – പ്രിയതാരത്തിന്റെ ഈ കുറിപ്പ് സന്തോഷ് കീഴാറ്റൂർ, സംവിധായകൻ രഞ്ജിത് ശങ്കർ തുടങ്ങി നിരവധി ആളുകൾ പങ്കുവെച്ചിട്ടുണ്ട്. നിലവിൽ ജീത്തു ജോസഫ് ചിത്രമായ റാം ൽ അഭിനയിച്ച് കഴിഞ്ഞാൽ ലിജോ ജോസ് പെല്ലിശ്ശേരി ചിത്രത്തിലാണ് മോഹൻലാൽ അഭിനയിക്കുക.
