നടന്‍ കൃഷ്ണകുമാറും കുടുംബവും മലയാളി പ്രേക്ഷകര്‍ക്ക് സുപരിചിതരാണ്. സോഷ്യല്‍ മീഡിയയില്‍ സജീവമായ അഹാന ഉള്‍പ്പെടെയുള്ള മക്കളുടെ വിഡിയോകള്‍ വൈറലാകാറുണ്ട്. ഭാര്യ സിന്ധുവും യൂട്യൂബ് ചാനല്‍ ആരംഭിച്ചിട്ടുണ്ട്. കൃഷ്ണകുമാറിന്റേയും സിന്ധുവിന്റേയും പ്രണയ വിവാഹമായിരുന്നു. സിന്ധുവിന്റെ വീട്ടിലെ എതിര്‍പ്പ് മറികടന്നാണ് ഇരുവരും ഒന്നായത്. ഇപ്പോഴിതാ ഇരുവരുടേയും വിവാഹം നേരത്തേയാകാന്‍ കാരണം മമ്മൂട്ടിയാണെന്ന് പറയുകയാണ് നടന്‍ മുകേഷ്.
മുകേഷിന്റെ യുട്യൂബ് ചാനലില്‍ അഹാന കൃഷ്ണ അതിഥിയായി വന്നപ്പോഴാണ് രസകരമായ പഴയ സംഭവം മുകേഷ് അഹാനയോട് പറഞ്ഞത്. സൈന്യത്തിന്റെ ക്ലൈമാക്‌സ് ഷൂട്ടിനിടെയുണ്ടായ സംഭവമാണ് മുകേഷ് പറയുന്നത്. മമ്മൂട്ടിയും എല്ലാവരുമുണ്ട്. ഷൂട്ടിങ് നടക്കുമ്പോള്‍ ആള്‍ക്കൂട്ടത്തിനിടയില്‍ അപ്പ ഹാജയേയും കൃഷ്ണകുമാറിനേയും കണ്ടുവെന്ന് മുകേഷ് പറയുന്നു. താന്‍ രണ്ടുപേരെയും വിളിച്ച് വിശേഷം തിരിക്കി. രണ്ടുപേരുടെ മുഖത്തും ഒരു വിഷമം കാണുന്നുണ്ട്. കാര്യം ചോദിച്ചപ്പോഴാണ് അറിഞ്ഞത് കൃഷ്ണ കുമാറിനൊപ്പം കാമുകിയുമുണ്ട്, വണ്ടിയില്‍ ഇരിക്കുകയാണെന്ന്. രണ്ടുപേരും ഏറെനാളായി പ്രണയിക്കുകയാണ് പക്ഷെ കാമുകിയുടെ വീട്ടുകാര്‍ക്ക് ആ വിവാഹത്തോട് താത്പര്യമില്ല. എന്ത് ചെയ്യണമെന്നറിയാത്ത അവസ്ഥയിലാണ് കൃഷ്ണകുമാറെന്നും അപ്പ ഹാജ പറഞ്ഞു.
താന്‍ ഇക്കാര്യം മമ്മൂട്ടിയോട് പറഞ്ഞു. ‘നീ പ്രണയിക്കുന്നത് തെറ്റല്ല. പ്രണയിച്ച കുട്ടിയെ തന്നെ വിവാഹം ചെയ്യുകയും വേണം. പക്ഷെ ഇപ്പോള്‍ നിന്റെ കൈയില്‍ അവളെ പോറ്റാനുള്ള വകുപ്പുണ്ടോ? അവളെ നിനക്ക് നന്നായി നോക്കാന്‍ പറ്റുമോ? അതുകൊണ്ട് നീ കുറച്ച് കൂടി ക്ഷമിച്ച് നില്‍ക്ക്. അപ്പോഴേക്കും നീ സിനിമയില്‍ നല്ല സ്ഥാനത്തെത്തും. അപ്പോള്‍ വിവാഹം കഴിക്കാം. അല്ലെങ്കില്‍ രണ്ടുപേരും പിന്നീട് ഈ ബന്ധത്തില്‍ ദുഖിക്കും’, മമ്മൂട്ടി പറഞ്ഞു. മമ്മൂക്കയുടെ ഉപദേശം കേട്ട ശേഷം ബുദ്ധിവന്ന കൃഷ്ണകുമാര്‍ സെറ്റിലായിട്ട് വിവാഹം കഴിക്കാമെന്ന തീരുമാനത്തില്‍ കാമുകിക്കൊപ്പം തിരികെ പോയെന്നും മുകേഷ് പറഞ്ഞു.
അച്ഛന്റെ പഴയ കഥകള്‍ കേട്ട് അഹാന ആകാംക്ഷയിലായി. പെണ്‍കുട്ടിയുടെ പേര് മുകേഷ് വെളിപ്പെടുത്താത്തതും അഹാനയുടെ ആകാംഷ കൂട്ടി. അതിന് ശേഷമുള്ള കഥ മുകേഷ് പറഞ്ഞു. കൃഷ്ണ കുമാര്‍ പോയശേഷം ഷൂട്ടിങ് പൂര്‍ത്തിയാക്കി തങ്ങള്‍ തിരികെ ഹോട്ടലില്‍ പോയി വിശ്രമിച്ചു. പിറ്റേന്ന് രാവിലെ ഒരു ഫോണ്‍ കോള്‍ വന്നു. അപ്പ ഹാജയായിരുന്നു ലൈനില്‍. കാര്യം തിരക്കിയപ്പോഴാണ് അറിയുന്നത് മമ്മൂക്ക ഉപദേശിച്ച് മനംമാറ്റി വിട്ട കൃഷ്ണകുമാറും കാമുകി സിന്ധുവും രജിസ്റ്റര്‍ വിവാഹം ചെയ്യാന്‍ പോവുകയാണെന്ന്. മമ്മൂക്കയുടെ ഉപദേശം കേട്ട് കൃഷ്ണകുമാറിന്റെ മനം മാറിയാലോയെന്ന് കരുതി കാമുകി സിന്ധു നിര്‍ബന്ധിച്ചതിനാലാണ് പിറ്റേ ദിവസം തന്നെ രജിസ്റ്റര്‍ വിവാഹം നടത്താന്‍ തീരുമാനിച്ചത്. ഇതിന്റെ പേരില്‍ മമ്മൂക്കയെ താന്‍ കളിയാക്കാറുണ്ടെന്നും മുകേഷ് കൂട്ടിച്ചേര്‍ത്തു.
