പ്രണവ് മോഹന്‍ലാലിനെ കേന്ദ്രകഥാപാത്രമാക്കി വിനീത് ശ്രീനിവാസന്‍ ഒരുക്കിയ ചിത്രമാണ് ഹൃദയം. ചിത്രം പുറത്തിറങ്ങി ഒരുമാസമാകുമ്പോഴും അതിന്റെ ആവേശം കെട്ടടങ്ങിയിട്ടില്ല. തീയറ്ററുകളില്‍ ഹൃദയത്തിന് ഇപ്പോഴും പ്രേക്ഷകരുണ്ട്.
ഹൃദയത്തിന്റെ സെറ്റില്‍ നിന്നുള്ള ഒരു വിഡിയോയാണ് ഇപ്പോള്‍ വൈറലായിരിക്കുന്നത്. ചിത്രത്തിലെ ദര്‍ശന എന്ന ഗാനത്തിന് ചുവടുവയ്ക്കുന്ന വിനീത് ശ്രീനിവാസനേയും പ്രണവിനേയും ദര്‍ശനയേയും മറ്റ് അണിയറപ്രവര്‍ത്തകരേയും വിഡിയോയില്‍ കാണാം.
ജനുവരി 21നായിരുന്നു ഹൃദയം തീയറ്ററുകളില്‍ എത്തിയത്. ചിത്രം 25 ദിവസം പൂര്‍ത്തിയാക്കിയതിന് പിന്നലെ ഒടിടി റിലീസ് തീയതിയും കഴിഞ്ഞ ദിവസം പ്രഖ്യാപിച്ചിരുന്നു. ഡിസ്‌നി പ്ലസ് ഹോട്ട്സ്റ്റാറില്‍ ഫെബ്രുവരി 18നാണ് ചിത്രത്തിന്റെ പ്രീമിയര്‍. അഞ്ച് വര്‍ഷത്തെ ഇടവേളയ്ക്ക് ശേഷം വിനീത് ശ്രീനിവാസന്റെ സംവിധാനത്തിലെത്തിയ സിനിമ കൂടിയാണ് ഹൃദയം. പ്രണവ് മോഹന്‍ലാല്‍ അവതരിപ്പിക്കുന്ന അരുണ്‍ നീലകണ്ഠന്‍ എന്ന കഥാപാത്രത്തിന്റെ കലാലയ ജീവിതം മുതല്‍ അയാള്‍ അച്ഛനാവുന്നത് വരെയുള്ള കഥയാണ് വിനീത് വളരെ ലീനിയറായി ‘ഹൃദയ’ത്തില്‍ പറയുന്നത്.
