പൃഥ്വിരാജും ഷാജി കൈലാസും ഒന്നിച്ച കടുവ ഇതുവരെ നേടിയത് 50 കോടി. പൃഥ്വിരാജും ഷാജി കൈലാസും തന്നെയാണ് ഇക്കാര്യം അറിയിച്ചത്. കടുവയെ പ്രേക്ഷകര്‍ സ്വീകരിച്ചതിന് ഇരുവരും നന്ദി പറയുകയും ചെയ്തു.
ആദ്യ നാല് ദിനങ്ങളില്‍ മാത്രം 25 കോടി രൂപയാണ് കടുവ നേടിയത്. പൃഥ്വിരാജിന്റെ കരിയറിലെ ഏറ്റവും മികച്ച ഓപ്പണിംഗ് കളക്ഷന്‍ ആയിരുന്നു ഇത്. തീയറ്ററുകളില്‍ കടുവയ്ക്ക് മികച്ച പ്രതികരണമായിരുന്നു ലഭിച്ചത്. ഷാജി കൈലാസ് എന്ന സംവിധായകന്റെ ഗംഭീര തിരിച്ചുവരവാണ് ചിത്രമെന്നാണ് പ്രേക്ഷകര്‍ ഒന്നടങ്കം പറഞ്ഞത്. പൃഥ്വിരാജിന്റെ കട്ട മാസ് പ്രകടനവും സിനിമാസ്വാദകരെ ത്രസിപ്പിച്ചു. അതിനിടെ കടുവ വിവാദത്തിലുംപ്പെട്ടു. പൃഥ്വിരാജിന്റെ ഒരു ഡയലോഗാണ് വിവാദമായത്. തുടര്‍ന്ന് മാപ്പ് പറഞ്ഞ കടുവ ടീം ആ ഡയലോഗ് സിനിമയില്‍ നിന്ന് നീക്കുകയും ചെയ്തു.
ഓഗസ്റ്റ് നാലിന് കടുവ ഒടിടിയില്‍ സ്ട്രീമിംഗ് ആരംഭിക്കുമെന്ന് നേരത്തെ അറിയിച്ചിരുന്നു. ആമസോണ്‍ പ്രൈമിലൂടെ ആകും ഒടിടി സ്ട്രീമിംഗ്. പൃഥ്വിരാജ് പ്രൊഡക്ഷന്‍സും ലിസ്റ്റിന്‍ സ്റ്റീഫന്റെ മാജിക് ഫ്രെയിംസും ചേര്‍ന്നാണ് ചിത്രം നിര്‍മിച്ചത്. ആദം ജോണിന്റെ സംവിധായകനും ‘ലണ്ടന്‍ ബ്രിഡ്ജ്’, ‘മാസ്റ്റേഴ്‌സ്’ എന്നീ ചിത്രങ്ങളുടെ തിരക്കഥാകൃത്തുമായ ജിനു എബ്രഹാമാണ് ‘കടുവ’യുടെയും രചന നിര്‍വഹിച്ചിരിക്കുന്നത്.
