നീണ്ട ഇടവേളയ്ക്ക് ശേഷം ജോഷി – സുരേഷ് ഗോപി കൂട്ടുകെട്ടിൽ എത്തിയ ചിത്രമാണ് പാപ്പൻ. കുടുംബപ്രേക്ഷകർ ഏറ്റെടുത്ത ചിത്രത്തിന് തിയറ്ററുകളിൽ മികച്ച പ്രതികരണമാണ് ലഭിച്ചത്. തുടരെ നടക്കുന്ന കൊലപാതക പരമ്പരകളിൽ ഉത്തരം കണ്ടെത്താനായി പൊലീസ് ഉദ്യോഗസ്ഥർക്ക് ഒപ്പം പ്രേക്ഷകരും സഞ്ചരിക്കുന്ന പ്രതീതിയാണ് ചിത്രം കണ്ടിരിക്കുന്നവരിൽ ഉണ്ടാക്കുന്നത്.
ചിത്രത്തിൽ എല്ലാ അഭിനേതാക്കളും മികച്ച പ്രകടനമാണ് കാഴ്ച വെച്ചിരിക്കുന്നത്. ഇതിൽ പ്രേക്ഷകരുടെ കൈയടി നേടിയ കഥാപാത്രങ്ങളിൽ ഒന്ന് ഷമ്മി തിലകന്റേതാണ്. ചാക്കോ എന്ന സീരിയൽ കില്ലർ ആയാണ് ഷമ്മി തിലകൻ ചിത്രത്തിൽ എത്തിയത്. പ്രതികാരങ്ങൾക്ക് സ്വയം ന്യായീകരണങ്ങൾ ഉണ്ടായിരുന്നു അയാൾക്ക്. ‘ഞാന്‍ കൊന്നവരൊക്കെ ചാകേണ്ടിയിരുന്നവരായിരുന്നു സാറേ, ഒന്നൊഴിച്ച്, അത് ഒരു അബദ്ധം പറ്റി പോയതാണ്,’ എന്ന് അയാള്‍ പറയുമ്പോള്‍ നായകനായ എബ്രഹാം മാത്തനൊപ്പം പ്രേക്ഷകര്‍ക്കും അയാളോട് സഹാനുഭൂതി തോന്നുകയാണ്.
അതേസമയം, തന്നെ തന്റെ ജീവിതത്തില്‍ വലിയ നഷ്ടങ്ങൾ ഉണ്ടാക്കിയ ചാക്കോയോട് പ്രതികാരം ചെയ്യാൻ കഴിയാതെ നിസഹായകനായി പോകുന്നു എബ്രഹാം മാത്യു മാത്തന്‍. ജയിലില്‍ നിന്ന് ഇറങ്ങിയതിന് ശേഷം മാത്തന്‍ വാങ്ങി നല്‍കിയ പൊറോട്ടയും ബീഫും കഴിച്ചുകൊണ്ട് താന്‍ ഇങ്ങനെ ആയതിന്റെ പിന്നിലെ കഥ ചാക്കോ പറയുന്നുകയാണ്. പാപ്പനിലെ ഏറ്റവും മനോഹരവും തീവ്രവുമായ രംഗം കൂടിയാണ് അത്.
