ഷറഫുദ്ദീൻ നായകനായി എത്തുന്ന ‘പ്രിയൻ ഓട്ടത്തിലാണ്’ തിയറ്ററുകളിൽ റിലീസ് ചെയ്തു. ഷറഫുദ്ദീനൊപ്പം അപർണ ദാസ്, നൈല ഉഷ എന്നിവർ പ്രധാനവേഷങ്ങളിൽ എത്തുന്ന ചിത്രമാണ് ‘പ്രിയൻ ഓട്ടത്തിലാണ്’. ചിത്രത്തിൽ നടൻ മമ്മൂട്ടി കാമിയോ റോളിൽ എത്തുന്നു എന്ന പ്രത്യേകതയും ഉണ്ട്. ബിജു സോപാനം, ഹക്കിം ഷാജഹാൻ, സുധി കോപ്പ, ജാഫർ ഇടുക്കി, സ്മിനു സിജോ, അശോകൻ, ഹരിശ്രീ അശോകൻ, ഷാജു ശ്രീധർ, ശിവം സോപാനം, ഉമ, ജയരാജ് കോഴിക്കോട്, വീണ, വിജി, വിനോദ് തോമസ്, ശ്രീജ ദാസ്, വിനോദ് കെടാമംഗലം, കുക്കിൽ രാഘവൻ, ഹരീഷ് പെങ്ങൻ, അനാർക്കലി മരക്കാർ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. ‘ചതുർമുഖ’ത്തിന് ശേഷം അഭയകുമാർ കെ, അനിൽ കുര്യൻ എന്നിവർ ഒന്നിച്ചു തിരക്കഥയും സംഭാഷണവുമെഴുതുന്ന ചിത്രമാണ് പ്രിയൻ ഓട്ടത്തിലാണ്. സൈറ ബാനുവിന് ശേഷം ആന്റണി സോണി സംവിധാനം ചെയ്യുന്ന ചിത്രം കൂടിയാണിത്. ശബരീഷ് വർമ, പ്രജീഷ് പ്രേം, വിനായക് ശശികുമാർ എന്നിവരാണ് പാട്ടുകൾ എഴുതിയിരിക്കുന്നത്.
ഏതായാലും ചിത്രം റിലീസ് ചെയ്യുന്നതിന് മുന്നോടിയായി നൽകിയ അഭിമുഖത്തിൽ സിനിമയിൽ എത്തുന്നതിനു മുമ്പുള്ള ജീവിതത്തിലെ ചില കാര്യങ്ങൾ തുറന്നു പറയുകയാണ് ഷറഫുദ്ദീൻ. വാഹനങ്ങളുടെ ഡീലർഷിപ്പ് സ്ഥാപനത്തിൽ സെയിൽസ് എക്സിക്യുട്ടിവ് ആയുള്ള ജീവിതകാലം ഓർത്തെടുക്കുകയാണ് താരം. ബൈജു എൻ നായർക്ക് നൽകിയ അഭിമുഖത്തിലാണ് ഷറഫുദ്ദീൻ ഇക്കാര്യങ്ങൾ തുറന്നു പറഞ്ഞത്. നടൻ ആസിഫ് അലി സിനിമയിൽ എത്തിയതിനു ശേഷം ആദ്യമായി വാങ്ങിയ കാർ ഫിയറ്റിന്റെ പുന്തോ ആയിരുന്നെന്നും ആ കാറിന്റെ സെയിൽസ് എക്സിക്യുട്ടിവ് താനായിരുന്നെന്നും ഷറഫുദ്ദീൻ പറഞ്ഞു. ‘ആസിഫിന് കാർ കൊടുത്തത് ഞാനാ. ആസിഫിന്റെ വീട്ടിലൊക്കെ പോയിട്ടുണ്ട്. സിനിമയിൽ വന്നതിനു ശേഷം ആസിഫിനെ കണ്ടിട്ടില്ല. വൈറസ് സിനിമയുടെ സെറ്റിൽ വെച്ചിട്ടാണ് ആസിഫിനെ ആദ്യമായി കാണുന്നത്. പരിചയപ്പെട്ടപ്പോൾ ഞാൻ പറഞ്ഞു എനിക്കറിയാമെന്ന്. അപ്പോൾ ആസിഫ് ‘യെസ് യെസ്’ എന്ന് പറഞ്ഞു. നിങ്ങളുടെ ഫിയറ്റ് പുന്തോ ഞാനാണ് നിങ്ങൾക്ക് തന്നതെന്ന് പറഞ്ഞു. ‘താനോ’ എന്ന് ആസിഫ് ചോദിച്ചു.’
‘അതില് വേറെയും കഥയുണ്ട്, ആ സമയത്ത് ആസിഫുമായി വഴക്ക് ഉണ്ടായിരുന്നു. ആസിഫിന് ഒരു ഡേറ്റിൽ കാർ വേണമായിരുന്നു. എന്നാൽ, വണ്ടി അതും കഴിഞ്ഞ് ഒരു മാസം കഴിഞ്ഞിട്ടായിരുന്നു വന്നത്. ആസിഫിന്റെ ബ്രദർ ഉണ്ട് അസ്കർ. അസ്കർ പത്തിലെ എക്സാം കഴിഞ്ഞു വരുമ്പോൾ വീട്ടിൽ കാർ ഉണ്ടാകുമെന്നോ മറ്റോ ആസിഫ് വാക്ക് കൊടുത്തിരുന്നു. അത് പാലിക്കാൻ കഴിഞ്ഞില്ല. എന്റെ മാനേജർ പറഞ്ഞ വാക്ക് ഞാനും കൊടുത്തു. ആസിഫിന്റെ നാട്ടുകാരൻ തന്നെ ആയിരുന്നു ഞങ്ങളുടെ സെയിൽസ് മാനേജർ. അതുകൊണ്ട് അത് ഡീല് ചെയ്തു. ഇതിലെ ഏറ്റവും ഇന്ററസ്റ്റിംഗ് ആയ കാര്യം ആസിഫിന്റെ വീട്ടിൽ ആസിഫിന്റെ ഉമ്മാനെ കാറ് കാണിക്കാൻ അന്ന് ആ സമയത്ത് പോകുമ്പോൾ, ആലുവ വഴി പോകുന്ന സമയത്ത് എന്റെ രണ്ട് കൂട്ടുകാരും കൂടെ വണ്ടിയിൽ കയറി, ആസിഫിന്റെ വീട്ടിലേക്കാണ് പോകുന്നതെന്ന് ഒന്നും ഞാൻ പറഞ്ഞില്ല. അത് വേറെ ആരുമല്ല, അൽഫോൺസ് പുത്രനും കൃഷ്ണശങ്കറും ആയിരുന്നു. ആസിഫിന്റെ വീട്ടിൽ കാർ കാണിക്കാൻ പോകുമ്പോൾ അവര് രണ്ടുപേരും കാറിൽ ഉണ്ടായിരുന്നു.’ – ഷറഫുദ്ദീൻ പറഞ്ഞു. ഇത് കേട്ട ആസിഫ് അലി ‘അൽഫോൺസ് പുത്രൻ എന്റെ വീട്ടിൽ വന്നിട്ടുണ്ടായിരുന്നോ’ എന്ന് അത്ഭുതത്തോടെ ചോദിച്ചെന്നും ഷറഫുദ്ദീൻ വ്യക്തമാക്കി. അൽഫോൺസ് പുത്രനും കൃഷ്ണശങ്കറും പുറത്ത് ഒരു കടയിൽ പോയി ചായ കുടിച്ചു. താൻ ആസിഫിന്റെ വീട്ടിൽ പോയി വണ്ടി കാണിച്ചിട്ട് വന്നെന്നും ആ വണ്ടി ആസിഫ് എടുത്തെന്നും ഷറഫുദ്ദീൻ ഓർത്തെടുത്തു.
