വിജയ് നായകനായ ബീസ്റ്റ് തീയറ്ററുകളില്‍ എത്തിയിരിക്കുകയാണ്. ചിത്രത്തിന് മികച്ച പ്രതികരണമാണ് പ്രേക്ഷകരില്‍ നിന്ന് ലഭിച്ചിരിക്കുന്നത്. മലയാളി താരം ഷൈന്‍ ടോം ചാക്കോയും ചിത്രത്തില്‍ ഒരു പ്രധാന കഥാപാത്രത്തെ അവതരിപ്പിച്ചിട്ടുണ്ട്. ഇപ്പോഴിതാ ബീസ്റ്റിലേക്ക് സംവിധായകന്‍ നെല്സണ് ദിലീപ് കുമാര്‍ വിളിച്ചതിനെക്കുറിച്ച് ഷൈന്‍ പറഞ്ഞതാണ് ശ്രദ്ധേയമായിരിക്കുന്നത്.
സംവിധായകന്‍ നെല്സണ് തന്റെ സിനിമകളൊന്നും കാണാതെയാണ് ബീസ്റ്റിലേക്ക് വിളിച്ചതെന്ന് ഷൈന്‍ പറയുന്നു. ഭാഷ ഏതായാലും നല്ല കഥാപാത്രങ്ങലെ അവതരിപ്പിക്കുക എന്നതാണ് തന്റെ ലക്ഷ്യം. കഥാപാത്രത്തെ പറ്റി ചോദിച്ച് മനസിലാക്കിയ ശേഷമാണ് നെല്‍സണിനെ പോയി കാണുന്നത്. പിന്നീട് ഡീറ്റെയിലായി കഥാപാത്രത്തെ കുറിച്ച് പറഞ്ഞു തന്നു. തന്റെ ഒരു സ്റ്റില്‍ കണ്ടിട്ടാണ് നെല്സണ് വിളിക്കുന്നത്. അദ്ദേഹത്തിന്റെ ഒരു അസിസ്റ്റന്റാണ് തന്റെ ഫോട്ടോ കാണിക്കുന്നത്. ഫോട്ടോ കണ്ടപ്പോള്‍ താനൊരു നിഷ്‌കളങ്കനാണെന്ന് നെല്സണ് തോന്നിയെന്നാണ് പിന്നീട് പറഞ്ഞത്. പക്ഷേ ആ ഫോട്ടോ ഏതാണെന്ന് പുള്ളി ഇതുവരെ പറഞ്ഞിട്ടില്ല. അത് ഏതായിരുന്നുവെന്ന് അറിഞ്ഞിരുന്നെങ്കില്‍ ഇവിടെ കുറച്ചുപേര്‍ക്ക് കാണിച്ചുകൊടുക്കാമായിരുന്നുവെന്നും ഷൈന്‍ പറഞ്ഞു.
വിജയ്ക്കൊപ്പമായിരുന്നു തന്റെ ആദ്യ രംഗമെന്നും ഷൈന്‍ പറയുന്നു. ആ സീന്‍ എടുക്കുന്നതിന് തൊട്ടുമുന്‍പായി വിജയ് തന്റെ അടുത്ത് വന്ന് തന്നെ വലിയ രീതിയില്‍ കംഫര്‍ട്ട് ആക്കി. വിജയ്യെ പോലെ ഒരു മഹാനടനൊപ്പം തമിഴിലെ തന്റെ അരങ്ങേറ്റം നടത്താനായത് വലിയ ഭാഗ്യമാണെന്നും ഷൈന്‍ ടോം പറഞ്ഞു. വിജയ് അഭിനയിക്കുന്ന ഒരു സെറ്റെന്ന് പറഞ്ഞാല്‍ അവിടെ ആളുകളുടെയും നാട്ടുകാരുടേയും ആരാധകരുടേയും വലിയ ബഹളമായിരിക്കും. എന്നാല്‍ അതിന്റെ എല്ലാം ഇടയില്‍ വളരെ കൂളായിട്ടാണ് ആള്‍ ഇരിക്കുകയെന്നും ഷൈന്‍ കൂട്ടിച്ചേര്‍ത്തു.
