തന്റെ സിനിമാ മോഹത്തിന് പ്രോത്സാഹനം നല്‍കിയും പിന്തുണച്ചതും സംവിധായകന്‍ അല്‍ഫോണ്‍സ് പുത്രനെന്ന് നടന്‍ സിജു വില്‍സണ്‍. തന്റെ സിനിമ മോഹം ആദ്യമായി പറയുന്നത് അല്‍ഫോണ്‍സിന്റെ അടുത്താണ്. എന്തുകൊണ്ട് നിനക്ക് ശ്രമിച്ചുകൂടാ എന്നു പറഞ്ഞ് പിന്തുണച്ചത് അല്‍ഫോണ്‍സ് പുത്രനാണ്. വിനീത് ശ്രീനിവാസന്റെ ‘മലര്‍വാടി ആര്‍ട്‌സ് ക്ലബ്’ എന്ന സിനി മയിലേക്കു പുതുമുഖങ്ങളെ തേടുന്നു എന്ന പരസ്യം തനിക്കും നിവിനും അയച്ചു തന്നത് അല്‍ഫോണ്‍സ് ആണെന്നും സിജു പറയുന്നു.
മലര്‍വാടിയിലേക്കുള്ള ഓഡിഷനില്‍ ആദ്യത്തെ റൗണ്ടില്‍ തന്നെ സെലക്ഷന്‍ കിട്ടി. ക്യാമറയില്‍ ഒന്നു മുഖം കാണിക്കാമെന്നേ അന്ന് ആഗ്രഹിച്ചുള്ളൂ. പക്ഷേ, രണ്ടു ഡയലോഗും കിട്ടി. മോഹന്‍ലാല്‍ ഫാന്‍സ് അസോസിയേഷന്‍ പ്രസിഡന്റായാണ് താന്‍ ചിത്രത്തിലെത്തിയത്. തന്റെ സീനിന് തിയറ്ററില്‍ കയ്യടി കിട്ടി, അത് ലാലേട്ടനു കിട്ടിയ കയ്യടി ആണെങ്കിലും തനിക്കത് ഊര്‍ജമായെന്നും സിജു പറഞ്ഞു.
മലര്‍വാടി ആര്‍ട്‌സ് ക്ലബില്‍ അഭിനയിച്ചതിന് തനിക്ക് 2,500 രൂപയാണ് പ്രതിഫലം കിട്ടിയത്. അത് അമ്മയ്ക്ക് ആണ് കൊടുത്തതെന്നും സിജു ഓര്‍ത്തു. സിനിമ മോഹവുമായി നടക്കുമ്പോള്‍ മമ്മി നീ സിനിമയും കണ്ട് നടന്നോ എന്ന് പഴിക്കുമായിരുന്നെന്നും പത്തൊന്‍പതാം നൂറ്റാണ്ട് കണ്ട് മമ്മിക്കു വല്യ സന്തോഷമായെന്നും സിജു പറഞ്ഞു. താരങ്ങളായ ഷറഫുദ്ദീനും കൃഷ്ണ ശങ്കറുമൊക്കെ ആയിരുന്നു തനിക്ക് പിന്തുണയെന്നും സിനിമ കാണാന്‍ കൊണ്ട് പോയിരുന്നത് അവര്‍ ആയിരുന്നെന്നും സിജു പറയുന്നുണ്ട്.
