സുരാജ് വെഞ്ഞാറമ്മൂട് കേന്ദ്രകഥാപാത്രമാകുന്ന ഹെവന്‍ എന്ന ചിത്രത്തിന്റെ ടീസര്‍ പുറത്തിറങ്ങി. നവാഹതനായ ഉണ്ണി ഗേവിന്ദരാജ് സംവിധാനം ചെയ്യുന്ന ചിത്രത്തില്‍ പൊലീസ് വേഷത്തിലാണ് സുരാജ് എത്തുന്നത്. സസ്‌പെന്‍സ് ത്രില്ലറാണ് ചിത്രമെന്നാണ് ടീസര്‍ നല്‍കുന്ന സൂചന. ജാഫര്‍ ഇടുക്കി, ജോയ് മാത്യു, അഭിജ, സുധീഷ് തുടങ്ങിയവരേയും ടീസറില്‍ കാണാം.
നേരത്തേ പുറത്തിറങ്ങിയ ചിത്രത്തിന്റെ ഫസ്റ്റ് ലുക്ക് പോസ്റ്റര്‍ ശ്രദ്ധ പിടിച്ചുപറ്റിയിരുന്നു. കത്തിമുനയിലിരിക്കുന്ന സുരാജായിരുന്നു പോസ്റ്ററില്‍. ഉണ്ണി ഗോവിന്ദ്‌രാജ്, പി എസ് സുബ്രഹ്‌മണ്യന്‍ എന്നിവര്‍ ചേര്‍ന്നാണ് ചിത്രത്തിന്റെ രചന നിര്‍വഹിച്ചിരിക്കുന്നത്. എ ഡി ശ്രീകുമാര്‍, രമ ശ്രീകുമാര്‍, കെ കൃഷ്ണന്‍, ടി ആര്‍ രഘുരാജ് എന്നിവര്‍ ചേര്‍ന്നാണ് നിര്‍മാണം. ഛായാഗ്രഹണം വിനോദ് ഇല്ലംപള്ളിയും എഡിറ്റിംഗ് ടോബി ജോണും നിര്‍വഹിച്ചിരിക്കുന്നു.
അന്‍വര്‍ അലിയുടെ വരികള്‍ക്ക് സംഗീതം പകരുന്നത് ഗോപി സുന്ദറാണ്. ഓഡിയോഗ്രഫി എം.ആര്‍ രാജാകൃഷ്ണന്‍, മേക്കപ്പ് ജിത്തു പയ്യന്നൂര്‍, വസ്ത്രാലങ്കാരം സുജിത്ത് മട്ടന്നൂര്‍, സംഘട്ടനം മാഫിയ ശശി, സൗണ്ട് ഡിസൈന്‍ വിക്കി, കിഷന്‍, ചീഫ് അസോസിയേറ്റ് ഡയറക്ടര്‍ ബേബി പണിക്കര്‍, കളറിസ്റ്റ് ശ്രിക് വാര്യര്‍, പിആര്‍ഒ ശബരി. ചിത്രം ജൂണ്‍ മാസത്തില്‍ തീയറ്ററുകളില്‍ എത്തും.
