‘മമ്മൂട്ടിയുമായുള്ള ബന്ധത്തിൽ ഉലച്ചിലുകളുണ്ടായിട്ടുണ്ട് പക്ഷേ, ഞാൻ ഒരിക്കലും അതിന് കാരണക്കാരനായിട്ടില്ല’ – തുറന്നുപറഞ്ഞ് സുരേഷ് ഗോപി

സിനിമാലോകത്ത് തനിക്കുള്ള ബന്ധങ്ങൾ ആഴത്തിലുള്ളതാണെന്ന് നടൻ സുരേഷ് ഗോപി. കൗമുദി മൂവീസിന് നൽകിയ അഭിമുഖത്തിലാണ് സിനിമാലോകത്തിലെ തന്റെ ബന്ധങ്ങളെക്കുറിച്ചും ചില ബന്ധങ്ങളിൽ ഉണ്ടായിട്ടുള്ള ഉലച്ചിലുകളെക്കുറിച്ചും സുരേഷ് ഗോപി മനസു തുറന്നത്. നടൻ മമ്മൂട്ടിയുമായുള്ള ബന്ധത്തിൽ ഉലച്ചിലുകൾ ഉണ്ടായിട്ടുണ്ടെന്നും എന്നാൽ അതിന് താൻ കാരണക്കാരൻ ആയിട്ടില്ലെന്നും വ്യക്തമാക്കുകയാണ് സുരേഷ് ഗോപി.

ആഴത്തിലുള്ള സൗഹൃദങ്ങളാണ് തനിക്ക് സിനിമയിൽ ഉള്ളതെന്നും അദ്ദേഹം പറഞ്ഞു. വളരെ ആഴത്തിൽ പതിഞ്ഞ സൗഹൃദങ്ങളുണ്ടെന്നും മമ്മൂട്ടി ആണെന്ന് പറഞ്ഞ് ആരെങ്കിലും വന്ന് ഫോൺ തന്നാൽ എഴുന്നേറ്റ് നിന്ന് മാത്രമേ താൻ സംസാരിക്കുകയുള്ളൂവെന്നും മമ്മൂട്ടിയുമായുള്ള ബന്ധത്തിന് ആ ആഴമുണ്ടെന്നും സുരേഷ് ഗോപി പറഞ്ഞു. എന്നാൽ, മമ്മൂട്ടിയുമായുള്ള ബന്ധത്തിൽ ഉലച്ചിലുകൾ ഉണ്ടായിട്ടുണ്ടെന്നും അതിന് താനല്ല കാരണക്കാരനെന്നും കാരണക്കാരനാവുകയില്ലെന്നും സുരേഷ് ഗോപി പറഞ്ഞു.

നടൻ വിജയരാഘവനുമായി ഒരു അമ്മ പെറ്റ മക്കളെ പോലെയാണെന്നും സുരേഷ് ഗോപി വ്യക്തമാക്കി. തന്റെ വല്യേട്ടനാണെങ്കിലും കുട്ടാ എന്നാണ് വിളിക്കുന്നത്. അത്തരത്തിൽ നിരവധി ബന്ധങ്ങൾ സിനിമയിലുണ്ട്. ഓരോരുത്തരുടെയും പേര് എടുത്ത് പറഞ്ഞാൽ ചില പേരുകൾ മിസ്സായി പോയെന്ന് ചിലർ പറയുമെന്ന് സുരേഷ് ഗോപി പറഞ്ഞു. സുരേഷ് ഗോപിയുടേതായി ഉടൻ റിലീസിന് ഒരുങ്ങുന്ന ചിത്രം ‘പാപ്പൻ’ ആണ്. സലാം കശ്മീരിനു ശേഷം ജോഷിയും സുരേഷ് ഗോപിയും ഒന്നിക്കുന്ന ചിത്രമാണ് പാപ്പൻ. ജൂലൈ 29നാണ് ചിത്രം റിലീസ് ചെയ്യുന്നത്. നിര്‍മാതാവ് ഡേവിഡ് കാച്ചപ്പിള്ളിയുടെ മകന്‍ അജയ് ഡേവിഡ് കാച്ചപ്പിള്ളിയാണ് ചിത്രത്തിന്റെ ക്യാമറ. നീത പിള്ള, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവന്‍, ടിനി ടോം, ഷമ്മി തിലകന്‍ തുടങ്ങിയവരാണ് മറ്റ് അഭിനേതാക്കൾ.