‘ഡർബനിലെ നിങ്ങളുടെ സിക്സറുകൾ പോലെ ഈ നിമിഷം ഞാൻ ഓർക്കും’; യുവരാജ് സിങിനെ കണ്ട സന്തോഷം പങ്കുവെച്ച് ടോവിനോ തോമസ്

തന്റെ ജീവിതത്തിലെ ‘ഫാൻ ബോയ്’ നിമിഷം പങ്കുവെച്ച് നടൻ ടോവിനോ തോമസ്. ഇന്ത്യയുടെ എക്കാലത്തെയും മികച്ച ബാറ്റ്സ്മാനായ യുവരാജ് സിങ്ങിനൊപ്പമുള്ള നിമിഷമാണ് ടോവിനോ സോഷ്യൽ മീഡിയയിൽ പങ്കുവെച്ചത്. ബേസിൽ ജോസഫ് സംവിധാനം ചെയ്യുന്ന മിന്നൽ മുരളിയാണ് ടോവിനോയുടെ അടുത്തതായി പുറത്തു വരാനിരിക്കുന്ന ചിത്രം. ഈ കാത്തിരിപ്പിനിടയിലാണ് ഇന്ത്യ കണ്ട എക്കാലത്തെയും മികച്ച ക്രിക്കറ്റ് താരമായ യുവരാജ് സിങ്ങിന് ഒപ്പമുള്ള ചിത്രം ടോവിനോ പങ്കുവെച്ചിരിക്കുന്നത്. ആരാധകർ എന്തായാലും പുതിയ ചിത്രം ആഘോഷമാക്കി മാറ്റിയിരിക്കുകയാണ്.

മിന്നൽ മുരളിയുടെ പ്രൊമോ ഷൂട്ടിംഗിനായി മുംബൈയിൽ എത്തിയപ്പോൾ ആയിരുന്നു യുവരാജിനൊപ്പം ഫോട്ടോ എടുത്തത്. ടോവിനോ തോമസിനൊപ്പം മിന്നൽ മുരളിയുടെ സംവിധായകൻ ബേസിൽ ജോസഫും യുവരാജ് സിങ്ങിന് ഒപ്പമുള്ള ചിത്രം പങ്കുവെച്ചിട്ടുണ്ട്. ഒരു നീണ്ട കുറിപ്പിനോട് ഒപ്പമായിരുന്നു ടോവിനോ യുവരാജ് സിങ്ങിന് ഒപ്പമുള്ള ചിത്രം പങ്കുവെച്ചത്. ‘എക്കാലത്തും ഞാൻ നിങ്ങളുടെ കടുത്ത ആരാധകൻ ആയിരുന്നു യുവരാജ് സിങ്ങ്. നിങ്ങളെ കണ്ടുമുട്ടാൻ കഴിഞ്ഞതിലും നിങ്ങൾക്കൊപ്പം കുറച്ച് സമയം ചെലവഴിക്കാൻ കഴിഞ്ഞതിലും അതിയായ സന്തോഷം. ഡർബനിലെ നിങ്ങളുടെ സിക്സറുകൾ പോലെ ഇത് എക്കാലവും ഞാൻ ഓർക്കും’ – ടോവിനോ കുറിച്ചു.

മിന്നൽ മുരളിയുടെ സംവിധായകൻ ബേസിൽ ജോസഫും യുവരാജ് സിങ്ങിന് ഒപ്പമുള്ള ചിത്രം പങ്കുവെച്ചു. ‘ക്രിക്കറ്റ് സൂപ്പർ ഹീറോയ്ക്കൊപ്പം’ എന്ന അടിക്കുറിപ്പോടു കൂടിയാണ് യുവരാജ് സിങ്ങിന് ഒപ്പമുള്ള ചിത്രം ബേസിൽ പങ്കുവെച്ചത്. ടോവിനോ തോമസിനെ നായകനാക്കി ബേസിൽ ജോസഫ് സംവിധാനം ചെയ്യുന്ന ‘മിന്നൽ മുരളി’ ഡിസംബർ 24ന് റിലീസ് ചെയ്യും. നെറ്റ്ഫ്ലിക്സിൽ ആണ് ചിത്രം റിലീസ് ചെയ്യുക. ഗോദ എന്ന ചിത്രത്തിനു ശേഷം ടോവിനോയും ബേസിലും ഒരുമിക്കുന്ന ചിത്രമാണിത്.