നടൻ വിജയിയുടെ പുതിയ ചിത്രമായ ‘ബീസ്റ്റ്’ തിയറ്ററുകളിലേക്ക് എത്തിയിരിക്കുകയാണ്. ഏപ്രിൽ 13നാണ് ചിത്രം റിലീസ് ചെയ്തിരിക്കുന്നത്. ചിത്രത്തിന് സമ്മിശ്ര പ്രതികരണങ്ങളാണ് ഇപ്പോൾ ലഭിക്കുന്നത്. നടൻ വിജയിയുടെ പ്രകടനത്തെ പുകഴ്ത്തുമ്പോൾ തന്നെ ചില നെഗറ്റീവ് റിവ്യൂകളും ചിത്രത്തിന് ലഭിച്ചിരുന്നു. അതേസമയം, സംവിധായകൻ നെൽസന്റെ സംവിധാനത്തിലെ ചില പാളിച്ചകളും സോഷ്യൽ മീഡിയയിൽ ചർച്ചയായിരിക്കുകയാണ്.
അതേസമയം, ബീസ്റ്റ് ചിത്രത്തിനൊപ്പം തന്നെ പ്രേക്ഷകരുടെ ചർച്ചാവിഷയമായിരുന്നു സൺ ടിവിക്ക് വിജയ് നൽകിയ അഭിമുഖം. പത്തു വർഷത്തിനു ശേഷമാണ് വിജയ് ഒരു ടെലിവിഷൻ ചാനലിന് അഭിമുഖം നൽകിയത്. ബീസ്റ്റഅ സംവിധായകൻ നെൽസൺ തന്നെയായിരുന്നു വിജയിയെ അഭിമുഖം നടത്തിയത്. താൻ ചെയ്ത സിനിമകളിലെ കഥാപാത്രങ്ങളിൽ ഏത് വേഷമാണ് വിജയിയോട് ജീവിതത്തോട് സാമ്യം തോന്നിയത് എന്ന് ചോദ്യത്തിന് ബീസ്റ്റും പോക്കിരിയും എന്ന മറുപടി ആയിരുന്നു വിജയ് നൽകിയത്.
‘പോക്കിരി എന്ന എന്റെ സിനിമയിലെ കാരക്ടർ ആണ് കുറച്ചൊക്കെ റിയൽ ലൈഫുമായി കണക്ട് ചെയ്യാൻ പറ്റുന്ന കഥാപാത്രമായി തോന്നുന്നത്. കുറച്ച് ബീസ്റ്റുമുണ്ട്. എന്നാൽ, ഇപ്പോൾ പറഞ്ഞത് ബീസ്റ്റ് സിനിമയുടെ പ്രമോഷന് വേണ്ടിയാണെന്ന് വിചാരിക്കരുത്’ – വിജയ് പറഞ്ഞു. ബീസ്‌റ്റിലെ കഥാപാത്രത്തിന്റെ ആറ്റിറ്റ്യൂഡും അതിലെ കഥാപാത്രം പ്രതികരിക്കുന്ന രീതിയോടും എളുപ്പത്തിൽ തന്റെ യഥാർത്ഥജീവിതവുമായി ബന്ധപ്പെടുത്താൻ കഴിയും. അതിലെ കഥാപാത്രം പ്രതികരിക്കുന്ന രീതിയും സംസാരിക്കുന്ന രീതിയുമാണ് താൻ ഉദ്ദേശിച്ചതെന്നും അല്ലാതെ വെടിവെച്ച് കൊല്ലുന്നതിനെക്കുറിച്ചല്ലെന്നും വിജയ് വ്യക്തമാക്കി.
