കഴിഞ്ഞദിവസം ആയിരുന്നു തമിഴ്നാട്ടിലെ എസ്‌എസ്‌സി, എച്ച്‌എസ്‌സി പരീക്ഷകളിൽ മികച്ച വിജയം നേടിയ വിദ്യാർത്ഥികളെ അനുമോദിക്കുന്ന ചടങ്ങ് വിജയ് മക്കൾ ഇയക്കം സംഘടിപ്പിച്ചത്. നടൻ വിജയയുടെ ആരാധകരുടെ സംഘടനയായ വിജയ് മക്കൾ ഇയക്കം നീലാങ്കരയിലുള്ള ആര്‍.കെ. കണ്‍വെന്‍ഷന്‍ സെന്ററിലാണ് ചടങ്ങ് സംഘടിപ്പിച്ചത്. ഈ ചടങ്ങിൽ ഉന്നതവിജയം നേടിയ മകൾക്ക് പകരം ആ കുട്ടിയുടെ പിതാവിനെ വിജയ് പൊന്നാട അണിയിച്ചതാണ് സോഷ്യൽ മീഡിയയിൽ ചർച്ചയാകുന്നത്.
പരീക്ഷകളിൽ ഉന്നതവിജയം നേടിയ നൂറുകണക്കിന് കുട്ടികളെയാണ് ചടങ്ങിൽ ആദരിച്ചത്. അറുന്നൂറിൽ അറുന്നൂറ് മാർക്ക് നേടിയ നന്ദിനി എന്ന കുട്ടിക്ക് ഡയമണ്ട് നെക്ലേസ് ആണ് സമ്മാനിച്ചത്. എന്നാൽ, പരീക്ഷയിൽ ഉന്നതവിജയം നേടിയ ആയിഷ എന്ന കുട്ടിക്ക് പകരം കുട്ടിയുടെ പിതാവിനെയാണ് വിജയ് പൊന്നാട അണിയിച്ചത്.
സിനിമയിൽ മാസ് ഡയലോഗുകളും സൂപ്പർ പരിവേഷ കഥാപാത്രങ്ങളും ചെയ്യുന്ന വിജയ് അവാർഡ് ദാന ചടങ്ങിൽ ചെയ്തത് മോശമായ കാര്യമെന്നാണ് സോഷ്യൽ മീഡിയ പറയുന്നത്. പരീക്ഷ എഴുതിയത് മകളാണെന്നും അച്ഛനല്ലെന്നും സോഷ്യൽ മീഡിയ ഓർമിപ്പിക്കുന്നു.
