നടി അഞ്ജലി നായര്‍ വിവാഹിതയായി. സഹസംവിധായകന്‍ അജിത് രാജുവാണ് വരന്‍. ഫേസ്ബുക്കിലൂടെ അജിത് തന്നെയാണ് വിവാഹ വിവരം പങ്കുവച്ചത്. അഞ്ജലിക്കൊപ്പമുള്ള ചിത്രവും അജിത് പങ്കുവച്ചിട്ടുണ്ട്.
നിരവധി സിനിമകളില്‍ ശ്രദ്ധേയമായ വേഷം കൈകാര്യം ചെയ്തിട്ടുണ്ട് അഞ്ജലി. 1994ല്‍ പുറത്തിറങ്ങിയ മാനത്തെ വെള്ളിത്തേര് എന്ന സിനിമയില്‍ ബാലതാരമായിട്ടായിരുന്നു അഞ്ജലിയുടെ അഭിനയരംഗത്തേക്കുള്ള അരങ്ങേറ്റം. തമിഴ് സിനിമയായ നെല്ലിലൂടെയാണ് നായികയായി എത്തുന്നത്. വൈശാഖ് സംവിധാനം ചെയ്ത സീനിയേഴ്‌സിലൂടെയായിരുന്നു അഞ്ജലിയുടെ രണ്ടാം വരവ്.
വെനീസിലെ വ്യാപാരി, മാറ്റിനി, അഞ്ച് സുന്ദരികള്‍, പട്ടം പോലെ, എബിസിഡി, മുന്നറിയിപ്പ്, മിലി, കമ്മട്ടിപ്പാടം, ആന്മരിയ കലിപ്പിലാണ്, പുലിമുരുകന്‍, ഒപ്പം, ടേക്ക് ഓഫ്, ദൃശ്യം 2, കാവല്‍ തുടങ്ങിയ നിരവധി സിനിമകളില്‍ അഭിനയിച്ചിട്ടുണ്ട്. മോഹന്‍ലാല്‍ നായകനായ ആറാട്ട് ആണ് അഞ്ജലിയുടെ ഏറ്റവും ഒടുവിലായി പുറത്തിറങ്ങിയ ചിത്രം. റാം, അവിയല്‍, കൊച്ചാള്‍, തുടങ്ങി നിരവധി സിനിമകള്‍ അഞ്ജലിയുടേതായി അണിയറയില്‍ ഒരുങ്ങുന്നുണ്ട്.
